BISAN kon nagkadaghan ang nagpa-enroll sa Aftercare Program alang sa mga naadik sa ilegal nga drugas sa siyudad sa Talisay.
Alang sa nagdumala sa maong programa, nga dili kini alarming apan dugang kalambuan hinuon.
“Dili siya alarming. It is a good thing, nga nagkadaghan, a lot of people are seeking treatment. Ang atong mission is just to provide treatment, atong trabaho is to treat the victims of the drug epidemic,” pagpasabot ni Dr. Rey Cesar Bautista, ang pangulo sa Talisay City health office Aftercare program.
Sukad sa pagsugod sa ilang programa niadtong 2012 hangtud karon, niabot na sa 952 ang ilang natabangan.
Sa pagsugod pa, tag-usa, hangtud nahimong lima na sa usa ka bulan ang ilang pasyente, hangtud nga nahimo nga 20 na ka mga pasyente, 50 ug nahimo nga gatusan.
Sukad sa Enero hangtud Setyembre ning tuiga, aduna nay 357 ka mga nagumon sa ilegal nga drugas, ang ni-avail sa libre nga programa sa syudad sa Talisay.
Diin 272 niini mao kadtong mga na-priso og buot nga mo-avail sa plea bargaining agreement. Kay mahatagan hingpit lang nga mahukman sa huwes nga gawasnon ang ni-avail sa bargaining, kon aduny certificate gikan sa kagamhanan nga nipaubos sa Aftercare Program ang usa ka piniriso.
Dunay 72 usab kanila ang walk-in kon boluntaryo nga buot ng magbag-o, hinungdan nga gustong’ magpatambal, aduna usab pito ka mga gipang-refer sa barangay, ug unom gikan sa Department of Social Welfare Service.
Gipasabot sa pangulo sa aftercare program nga bisan kon nagkadaghan na ang ni-avail, wala sila maalarma niini, kundi ila pang gipasalamat nga mas nidaghan kini karon nga nipatim-aw aron magpatambal.
Matud ni Bautista nga labing maayo kini kay pasabot niini nga mas daghan na ang nakaamgo nga dili maayo ang ilang gihimo.
Ang ilang libre nga programa, unom ka bulan, diin libre ang drug test kada adlaw, pagsiguro nga bisan kausa atol sa pagpaubos sa programa, nilikay na gyud sila sa paggamit sa drugas.
Ug kon maka-gradudate na, aduna pay dugangduha ngadto sa tulo ka adlaw matag semana nga pagtuyo sa ilang clinic diha sa barangay Poblacion nga kabahin pa sa Aftercare.
Una usab sila tabangan alang sa pagpalambo mga kahibalo, alang na sa ilang pagpanarbaho.
Ang kagamhanan sa syudad sa Talisay ang nigahin og tag P3 milyunes nga budget alang niini ug sa ubang programa sa Aftercare. (FMD)