NAUGDAW ang annex building sa Pusok National High School nga giokuparan sa principal’s office ug library sa tunghaan sa sunog sa Sitio Matumbo, Barangay Pusok, dakbayan sa Lapu-Lapu, alas 3:15 sa kaadlawon niadtong Miyerkules, Oktubre 2.
Gawas sa naasoyng building nasunog usab ang moabot sa 15 ka mga panimalay nga nahimutang luyo sa tunghaan human daling nakakatap ang kayo.
Matod ni SFO1 Hadji Samonte ang imbestigador sa Lapu-Lapu City Fire District nga nagsugod gayud ang kayo sa annex building sa naasoyng tunghaan ug daling nakakatap sa silingang mga panimay base sa sugilon sa gwardiya sa tunghaan nga maoy unang nakamatikod sa kayo.
Giingong taudtaod una pa nakatawag ug bombero ang mga tawo sa dapit lakip na ang guwardiya hinungdan nga pag-abot sa bombero dako-dako na gayud ang kayo ug nakalabang na sa residential area luyo sa tunghaan.
Gumikan sa kahinay sa pressure sa tubig sa mga fire hydrant palibot sa dapit nasunogan giisa gilayon sa kabomberohan ang alarma sa sunog ngadto sa Task Force Alpha, alas 4:00 sa kaadlawon.
Naglisod usab ang kabomberohan pag sulod gilayon sa residential area luyo sa nasunog nga tunghaan gumikan sa kakuwang ug access road sa dapit.
Kinahanglan pa ipalabang ang mga hose sa koral sa tunghaan aron makakombati ang kabomberohan sa kayo.
“Under investigation pa ni siya pero posible gyud electrical gyud ni siya pero mao nang dili kaayo siya daghan ang nasunog kay konkreto man ang mga structure ngadto sa luyo (sa tunghaan),” matod ni Samonte.
Gibanabanang moabot sa P550,000 ang danyos sa sunog nga nakontrolar human sa 52 minutos.
Hingpit kini nga napawong sa pagka alas 7:00 na sa buntag.
Wala hinuoy nakalas o nangol sa sunog.
Wala ra usab maapektohi ang klase sa Pusok National High School. (GCM)