NANGAYO og 13 ka adlaw nga lugway ang Filinvest Land Incorporated ngadto sa Cebu City Government para ilang matiwas og guba ang walo ka dagko nga haligi sa IL Corso Mall nga nahimutang sa South Road Properties (SRP).
Base sa suwat ni Archie Igot, assistant vice president sa FLI nga gipadala ngadto ni Cebu City Legal Officer Rey Gealon, ilang gipahibawo nga 78 porsiyento nang nahuman ang ilang pagguba sa mga haligi nga niabot sa setback.
Pinaagi ni Igot, ang FLI nihangyo nga tagaan sila hangtod sa Oktubre 15 para ilang matiwas og guba ang mga halagi nga maoy pundasyon unta sa taytayan nga pagahimuon nga manukad sa ilang residential area nga nahimutang sa atbang sa ilang mall.
Ang City Government, pinaagi ni Gealon ug Atty. Jose Daluz III nga maoy SRP manager, nipadala og suwat sa FLI niadtong Hulyo 30 nga naghatag og 60 ka adlaw isip ultimatum para ilang gub-on ang maong mga estruktura.
“We are inclined to grant FLI the 13 day extension it prayed for, but with a stern warning that should it fail yet again to complete the demolition and reconstruction works, the City will utilize its vast human and material resources to undertake subsequent work subject to reimbursement of the costs, including damages,” padayag ni Gealon.
City Hall mouli sa 4.5 bilyones
Andam mouli ang Cebu City Government sa FLI sa P4.5 bilyones nga ilang nabayad sa P19.2 bilyones isip 50 percent downpayment ug first installment dihang ilang napalit ang maong yuta niadtong 2015.
Kini ang gipadayag ni Daluz sanglit desidido ang City Hall ubos sa liderato ni Labella sa pagkanselar sa kontrata nga ilang gisudlan human usab sila nianunsyo niadtong 2016 dihang niasumir si kanhi Mayor Tomas Osmeña nga iyang ikansel ang contract.
Ang SM ug Ayala Land nga maoy nakapalit sa 26 ektaryas nga yuta wala nipatuo ni Osmeña ug padayon silang nibayad sa installment hangtod naimpas sa korte pinaagi sa consignation.
Dugang ni Daluz nga di husto ang P2.7 bilyones nga gi-escrew sa FLI niadtong Agusto niining tuiga sa korte dihang wa kini dawata ni Labella. (PAC)