WAY vendors nga tugotan nga makapamaligya sa tulo ka mga karsada sa Dakbayan sa Sugbo nga naglangkob sa Colon, Osmeña boulevard ug N. Bacalso avenue.
Kini ang gipadayag ni Raquel Bohol-Arce, pangulo sa Prevention Restoration Order Beautification Enhancement (PROBE) bisan pa sa pagdagsa sa kapin o kuwang 300 ka mga vendor sa Plaza Sugbo sa Miyerkules sa buntag atol sa consultative meeting.
Pipila ka vendors wa makapugong, nanlugmaw ang mga luha sa pipila ka mga mamaligyaay.
“Wala gyud mo-mention si Mayor Edgar Labella nga makabalik sila sa Colon, Osmeña boulevard or sa N. Bacalso. Niingon si Mayor nga makabalik mo sa inyong panginabuhian. Abli ta sa kausaban, ang Colon, Osmeña boulevard and Natalio Bacalso are the landmarks of Cebu City,” padayag ni Arce.
Ang pangulo sa Probe nagkanayon nga ang maong mga karsada maoy gipangayo sa national government nga limpyohan sa City Hall sanglit sulod na sa lima ka dekada gihugpaan sa mga vendor hinungdan nga ang mga tawo maglisod na og agi.
“Ayaw lang sa sidewalk nga kusog ang bul-og sa pedestrian unya gamay lang ang sidewalk unya pun-an pa gyud nila kay mao nay atong gibalanse. Akong klaruhon, dili pa tanang sidewalk ang na-clear nato,” dugang ni Arce.
Matod niya nga aduna pay vendors sa dalan Jakosalem, Manalili, Magallanes ug ubang mga karsada.
Sabton
Si Arce, kinsa maoy gisaligan ni Labella sa paglimpyo sa sidewalk ug karsada, nanawagan sa publiko nga sabton usab ang ilang trabaho sanglit igo lang sila nagtuman sa kamanduan sa Siyudad ug Malacañang.
“I would like to ask the public to please bear with us. We are doing it gradually kay dili man ni sila murag kamunggay nga ato lang haruson kay ato ning gihuna-huna nga ila sab ning panginabuhian ug kinahanglan nga aduna silay kabalhinan,” pasabot ni Arce.
Gipadayag niya nga nakighinabi na sila ni Market Administrator Jonil Matuguina nga ablihan sa merkado ang mga bakanteng pwesto para sila legal nga makapaninda.
Ang uban adto ipabilin sa Tabo sa Banay.
Nihilak nga nangaliyupo
Nitulo ang luha sa duha ka mga lider sa vendors, kinsa naninda sa Osmeña boulevard duol sa Metrobank.
Usa kanila niingon nga nahunong na pagtungha ang iyang anak kay naglisod na sila sa panginabuhi dihang wa na sila gitugotan nga makatinda pipila na ka semana ang nakalabay.
“Ang among gihangyo nga tagaan lang mi bisan gamay nga lugar ug naa lang mi magasto bisan gamay sa among mga bata nga nag-eskwela. Wa na silay bawon ug wala na kaeskwela ang among anak,” padayag sa vendor nga wa magpaila.
“Maam, amo lang ihangyo, Maam, nga mobalik lang mi sa among pwesto bisan 2x2 lang, Maam. Maluoy ka namo, Maam. Nagtapok mi didto sa Tabo sa Banay unya wala mi halin didto,” padayag sa naghilak usab nga inahan nga naninda sa dan Colon.
Si Arce nagkanayon nga mopatawag pa sila og balik sa mga vendor sunod semana aron hapsayon tanan nilang problema ug para mahatagan kini og kasulbaran.