KIDAPAWAN CITY -- Gipasidan-an ang katawhan sa kapulisan sa North Cotabato sa modus operandi sa gibaligya nga LPG Anti-Leakage Device o LPG Safety Device.
Una nang nadiskubre ang pangilad sa mga namaligya sa peke nga LPG regulator sa Magpet sa nahisgutang probinsiya.
Target sa mga suspek ang mga senior citizen, walay mga kauban sa balay nga mga asawa, ilabi na kadtong dunay mga mahalon nga gamit.
Nagpaila ang mga mangingilad nga taga-gobyerno nga sakop sa Bureau of Fire Protection (BFP) nga nagpahigayon og survey sa ilang gigamit nga LPG brand.
Ang dala nga LPG Safety Device o LPG Anti-Leakage Device sa mga suspek ilang gibaligya sa kantidad nga P2,000 hangtud P11,000 apan mapalit lamang kini sa merkado og P500.
Nagpasidaan si North Cotabato Police Provincial Office Director Maximo Layugan sa mga molupyo sa probinsiya nga dili pasudlon ang naasoy nga
grupo sa ilang panimalay gumikan mangawat sab kini sa ilang mga mahalon nga gamit ug dili sab magpailad sa ilang dala nga produkto.
Giklaro ni Layugan ug Magpet chief of police Captain Rolando Dillera nga walay ahensiya sa gobyerno ang namaligya sa LPG Anti-Leakage Device o kaha nag-endorso sa maong produkto.
Naghangyo si Layugan sa katawhan sa probinsiya nga kung masaag sa ilang dapit ang maong grupo, itaho dayon sa mga awtoridad aron madakpan. (Edgar E. Fuerzas)