DIGOS CITY -- Mihimo na og lawom nga imbestigasyon ang Digos City Police Office (DCPO) human nadiskubre nga gibalbag ang usa ka pantyon sa sementeryo ug gituohang gilugos ang senior citizen nga bag-o lang gilubong.
Nakurat na lang ang pamilya sa biktima dihang nadiskubre nga nahubo na ang underwear sa minatay nga nailhang si Isabel Bastatas, 84-anyos, kinsa gilubong sa Digos City Public Cemetery niadtong Sabado, Septyembre 28.
Adlaw'ng Dominggo, dihang nibisita pagbalik sa lubnganan ang pamilya sa namatay ug nakurat sila dihang nakita nga anaa na sa gawas sa pantyon ang patay'ng lawas sa lola ug wala na kini mga sapot ug dayag na sab ang pribadong parte sa lawas niini diin naka-ekis pa ang tiil.
Dako ang panaghap sa pamilya nga gipanamas-tamasan ang patay'ng lawas mao nga nagpakitabang sila sa kapulisan.
Mihimo na og imbestigasyon ang kapulisan aron masayran kon unsa ang nahitabo sa lola human nasikop ang duha ka menor de edad nga gitudlong mga suspek kagahapong adlawa, Miyerkules, Oktubre 3.
Gitakdang dalhon sa buhatan sa mayor ang mga suspek kinsa usa kanila nailhan nga usa ka alyas Erwin.
Apan, hugot nga gilimod sa suspek ang pasangil tungod kay inosente, matud pa, siya sa krimen.