USA ka lalaki ang gidudahang gi-salvage ug gilabay sa mingaw ug hilit nga dapit sa dalan Maria Cristina, Barangay Camputhaw, siyudad sa Sugbo kagahapon sa kaadlawon.
Atol ning pagsuwat, wala pa mailhi ang biktima nga gidaduhang gikan sa prisuhan tungod sa daghang patik sa lawas.
Nakita nga dunay duha ka mga samad pinusilan sa ulo ug dughan agi sa kalibre .45 nga armas.
Gibanabana nga kapin kini sa 20-anyos, nag-short pants, gahukas, 5’3 ang gitas-on, kasarangan ang panglawas ug pamanit, adunay patik sa tiyan sa pangalan nga ‘diaz’, duha ka patik nga bitoon sa iyang bukton.
Sa pasiunang imbestigasyon ni PO3 Romel Bancog ug mga kaubanan sa Homicide Section nagbutyag nga nakadungog ug duha ka buto sa armas si Carl Bia, kinsa nagpuyo sa dapit.
Human sa pipila ka minuto, iyang gisusi ang maong buto ug maoy iyang nakita ang biktima nga nagbay-ad daplin sa dalan ug nagkadugo.
Gipahibalo dayon ang barangay hall ug kapulisan.
Matud ni Bancog, way nakaila sa biktima diha sa dapit.
Nakig-alayon ang Homicide Section sa laing units ug mga bilanggoan aron maila kon si kinsa ang maong biktima.