ALLEN, Northern Samar -- Opisyal sa usa ka barko ang nasikop gumikan sa paghupot og mga armas nga way lisensya.
Ang pagsikop nahitabo sud sa M/V Natahan Matthew nga nag dunggo sa Sta. Clara port sa Allen, Northern Samar, alas 2:30 sa hapon, Miyerkules, Oktubre 2, 2019.
Giila ang nasikop nga si Jhunry Manulat, 40, second mate, taga Poblacion Danao, Cebu.
Base sa report, ang mga sakop sa Philippine Coast Guard ug kapulisan sa Allen ang nihimo og routine inspection sa barko partikular sa cabin sa suspek.
Nasakmit sa mga awtoridad ang mga armas ug bala sa nagkalain-lain nga kalibre.
Naglangkod kini sa 1 ka kalibre .45 nga pistola, 1 ka 357 magnum revolver, 2 ka magazine sa kalibre .45 ug 31 ka round sa bala sa samang kalibre, 33 rounds nga bala sa kalibre .9mm, 6 ka rounds sa kalibre .38 ug 2 ka round sa kalibre .22.
Duna usab duha ka optical sights ug 1 ka gun suppressor.
Naa na sa kustodiya sa Allen Police Station ang suspek. (JKDP)