AKONG pahalipayan ang Cluster 6 nga nidaug sa unang ganti sa LGU Nite Retro Dance Competition sa City of Naga niadtong Martes. Ang mga opisina sa Information Technology, Gen. Services, Local Civil Registrar, City Admin ug BAC, Cenro ug City Events & Sports Dev’t. Unit maoy nilangkob sa Cluster 6.
Mga pahalipay usab sa Cluster 4 (MO, SPP/Cipro, CPDC, HRD, Peso, SP, Liga ug Legal) – ikaduhang ganti, Cluster 7 (Treasurer, Popcom, VMCH/Infirmary) – ikatulong ganti.
Mga kanta sama sa Mambo No. 5, Livin’ La Vida Loca, Shake Your Groove Thing, Macarena, Body Rock, Electric Dreams, Lambada, Whip It, Jump ug uban pa ang gisayawan sa mga nangapil.
Maayo sab nga napili ang tema nga retro aron makadungog ang mga millenials sa kanindot sa mga kanta sa 70s, 80s ug 90s.
Magsaulog ang dakbayan sa Naga sa pista ni San Francisco de Assissi karong Okt. 10. Malipayong pagsaulog!
•••
Nilampos si Kim Molina sa pagpakita sa iyang abilidad sa pag-arte sa pelikulang Jowable nga giingong nikita og dako sa takilya.
Nakadayeg sab ko sa kamaayo sa screenplay ug sa mga dialogs. Kon pirmeng ingon ani ang ipakitang mga pelikulang Tagalog, way duda, mosuporta gyud ang mga makisine.
•••
Mga pahalipay ngadto nila ni Elaine Duran, John Marc Saga ug John Michael dela Cerna, ang Top 3 sa bag-o lang natapos nga Tawag ng Tanghalan sa Showtime Season 3.
Hinoon, alang nako, kon parehas lang ang suporta sa network, morag mas may purohan nga mosikat og maayo si John Michael. Feel ko lang.
•••
Apil ko sa mga nangutana kon wa bay laing istilo sa sinina si Janella Salvador gawas sa off-shoulder tops sa teleserye nga The Killer Bride. Unya puparehas sab ang kolor.
Gusto kahang ipagawas ni Janella o sa kinsa may nagbuot ani nga nindot siyag abaga? O di ba kaha dali siyang initan ug singuton kon matabunan ang abaga sa dalaga?
O, laing posibilidad, nga duna kini kalabutan sa mga paukyab ug patuyoktuyok sa mga umaabot nga episodes sa maong teleserye.
•••
Unsa kahay hunahuna ning mga prodyuser sa Manila nga mantinilan na man lang og video conference ang Cebu media kon dunay ipa-interbyu nga artista o i-promote nga proyekto?
Aron kaha pag-emphasize sa gahom sa social media? O nagdaginot lang gyud sila? Pangutana!