GAWAS sa Hinakpan Hills, kon maghisgot ta og dapit suroyanan, ikapasigarbo usab sa mga molupyo sa siyudad sa Guihulngan, lalawigan sa Negros Oriental, ang Kansalakan Enchanted River.
Ang suba nahimutang sa utlanan sa Barangay Balogo ug Barangay Banwague, mga bukirang lugar sa Guihulngan.
Gibana-banang kapin sa 130 kilometros ang gilay-on gikan sa dakbayan sa Dumaguete.
Naila ang Kansalakan Enchanted River sa iyang color green o turquoise nga tubig.
Adunay bahin niini nga lawom ug delikado langoyan kon dili ka makamao. Aduna hinuoy parte usab sa sapa nga mabaw ug makaligoan sa mga bisita nga dili makamao mosawom.
Sa kilid niini, makita ang lingin nga lungag nga daw porma og mata sa suba o susama sa usa ka gamay nga pool.
Sa tungatunga sa suba, ang paborito nga diving o jumping spot sa mga lokal ug mga bisita.
Abli sa publiko ang pagkaligo sa Kansalakan ug way entrance fee nga bayran.
Tuyuonon ang sapa diin may maagian nga tungason apan konkreto nga karsada padung didto nga delikado kon dili ka anad momaneho subay sa kurbadahon nga dalan ug kon magpasutoy og dagan.
Kon hilig nimo ang road trip, makasugakod ang dagko nga mga sakyanan apan seguradoa lang nga nasusi na nimo ang tanang parte sa imong sakyanan.
Mahimo usab magpakyaw og habal-habal paingon sa Kansalakan Enchanted River. P350-P400 ang pleti o magdepende sa inyong sabot sa drayber kon daghan mo.
Gibanabana nga mga 30 minutos ngadto sa 40 minutos ang biyahe gikan sa sentro sa Guihulngan o depende sa gikusgon sa dagan sa motorsiklo nga imong sakyan.
Inig abot nimo sa lokasyon, makita na dayon ang suba tungod kay naa lang kini mahimutang daplin sa karsada.
Bugnaw sa lugar kay daghan og lainlaing klase sa mga punoan sa kahoy sa palibot.
Samtang mangaligo, mahimo ka mag-selfie o mag-pose nga pang Instagram. Apan pag-amping kay dagko ug may pagka dangog ang mga bato sa sapa.
Bugnaw ug crystal clear ang tubig sa Kansalakan Enchanted River.
Ang Kansalakan gitandi sa ubang mga tawo sa nabantog usab nga enchanted river sa lungsod sa HInatuan, lalawigan sa Surigao del Sur.