HATAAS man tuod ang panahon nga wala na makapakita og aksyon si kanhi world champion Milan Melindo, apan masaligon ang head trainer sa Ala Boxing Gym nga si Edito Villamor nga modaog gihapon kini sa iyang umaabot nga away didto sa Japan.
Kini tungod kay iyang nakita ang kakugi niini atol sa ensayo.
“Salig gihaponmi tungod kay maayo man og dagan iyang training,” matod ni Villamor sa dihang gikahinabi sa SunStar. Cebu.
Si Melindo, kinsa bag-o lang nag-31 anyos, mosaka og balik ibabaw sa ring human sa usa ka tuig nga pahuway. Ug ning higayona, iyang ikasangka ang wala pay pildi nga haponanon nga si Junto Nakatami nga gikatakda ugmang adlawa sa Tokyo, Japan.
Moaway si Melindo sa superflyweight division nga mas bug-at sa iyang naandan nga timbang.
Katapusang nakaaway si Melindo niadtong Oktubre 7, 2018 sa Yokohama diin iyang gisuwayan paglangkat ang World Boxing Council (WBC) light flyweight belt ni Ken Shiro. Sa maong away, na TKO siya sa ikapito nga round.
Sa wala pa ang maong away, si Melindo napildi pinaagi sa unanimous decision ni Ryoichi Taguchi sa ilang world title unification bout sa Disyembre 31, 2017, didto gihapon sa Japan.
Si Nakatani, sa iyang bahin, usa sa gilantawan nga umaabot world contender sa Japan nga may igo usab nga abilidad.
Pero alang kang Villamor anaa gihapon ang iyang pagtuo nga nakabintaha si Melindo ning awaya.
“Maayo siya. Technical fighter ug makamao sab nga mo-pressure,” matod ni Villamor kinsa mibutyag nga ang straight niini maoy bantayanan kay walhon man si Nakatani.
Dugang pasabot ni Villamor nga wala pa makakontra si Nakatani og boksidor nga sama ka kalidad ni Melindo kinsa adunay 37-4, 13 KOs nga record. Samtang si Nakatani adunay 19-0, 14KOs nga baraha. (JBM, EKA)