ARON kahatagan og insaktong preparasyon, nahan-ay na ang mga adlaw sa elimination round alang sa Sinulog sa Gallera 2020 6-Stag/cock Derby Challenge nga ipahigayon sa New Gallera de Mandaue sa Barangay Tabok, Mandaue City.
Sa pot money nga P3,500, ang entry hatagan usab og libring coupons sa Casino-Filipino Cebu nga mobalor og P20,000.
Mokabat ngadto sa P11 milyones ang nagpaabot sa mga mananaog ug gawas niini aduna pay kahigayonan ang matag entry nga makadaog og brand new nga Toyota Vios.
Si Wading Monsanto, ang tigdumala sa Gallera, mibutyag nga sa sunod buwan, ang 2-cock/stag combo elimination round ipahigayon sa Nobiyembre 8, 15, 22 ug 29.
Samtang sa Disyembre, kini himuon sa petsa 5, 7, 12, 14, 19, 21, 26 ug 28.
Subay niini, gipahibawo usab ni Monsanto nga nagpadayon ug permamenti na usab ang 3-win promo sa Gallera matag Dominggo.
Ang registration fee mokantidad og P500 samtang ang premyo P15,000 nga mabira diha-diha dayon kon ang entry ma-champion. (PR)