NATAPUS na ang gitagal ni Presidente Duterte nga pagpanglimpiyo sa kadalanan ug asiras. Sumala sa report nga atong nadawat nga natagbaw ang opisyal sa Department of Interior and Local Government (DILG) sa gihimong pagpanglimpiyo sa Cebu City ug Mandaue City. Bisan og dili pa gayud perpekto kini apan nakasabut ang DILG sa kalisud sa maong gimbuhaton. Nalimpiyo na tuod ang kadalanan ug asiras sa mga vendor apan nangreklamo usab ang mga nanindahay sa asiras tungod kay daku ang pagminus sa ilang halin nga dili na makasapar sa ilang panginahanglan.
Uyon ako sa sintimiyento ni Cebu City Mayor Edgardo Labella pabor sa mga vendor. Mihangyo siya kang Presidente Duterte pinaagi kang Senador Bong Go nga hatagan og higayon ang mga naninda sa asiras nga makabalik sila apan adunay mga kondisyon. Ang labing mahinungdanon mao nga sila dili makababag sa mga tawo nga mangagi sa sidewalk. Kinahanglang limpiyo usab kanunay ang ilang palibut. Alang kanako mahimo kaayo silang makapaninda ubos sa estriktong pagbantay sa city hall.
Sa laing bahin, karon nga hamugaway na ang pag-agi sa mga sakyanan sa kadalanan hinaut pang motuman na usab ang mga drayber sa mga lagda ug reglamento sa trapiko. Daghang kaayong ihatag nga katarungan nganong huot ang trapiko apan ako mutombuk gayud sa pagka-way disiplina sa mga drayber nga maoy nag-unang katarungan sa heavy traffic. Subay niini, akong awhagon ang atong mga traffic enforcer nga tinuoran gayud ang pagdakop sa mga malapason ug pahamtangan sila og tukmang silot ug multa. Nagtuo ako nga daku kaayo kini og matampo sa pagsulbar sa kahuot nga trapiko sa kadalanan.
•••
Dili maayo kining gihimo sa mayoriya sa mga senador sa Estados Unidos (US) nga mag-ban kun magdili sa pagpasud sa ilang nasud sa mga opisyal sa gobiyerno sa Pilipinas nga adunay kalabutan sa pagpapriso kang Senador Leila de Lima. Sila nagtuo nga kining pagpriso kang De Lima politically motivated. Nganong sila man maoy mohusgar sa pagka-kalabuso sa senadora nga human na man kini desisyoni sa korte? Bisan ang Supreme Court mi-uyon nga legal ang pagdakop kang De Lima. Karong bag-o, sa senate investigation kalabut sa pagbuhi sa mga piniriso subay sa Good Conduct Time Allowance (GCTA) mitumaw na usab ang kalikukan ni De Lima kalabut sa illegal drugs sud sa National Bilibid Prison.
Samtang daghan sa atong mga balaud kinupya gikan sa US apan wa kini magpasabut nga makapanghilabut sila sa domestic affairs sa atong nasud. Dili usab sila makapanghambug nga wa makasupak sa tawhanong katungod tungod kay daghan silang gipamatay nga way mga sala, labi na niadtong panahun sa gubat diin libuan ka mga Pilipino ang ilang gi-ihaw ug gidala pa gayud ang kampana sa Balangiga nga ilang giila nga maoy ilang trophy sa maong salaud. Apan unsa man usay buhaton niining mga opisyal nato didto sa US? Daghang kasuroyan dinhi sa atong nasud o ba kaha sa mga nasud sa Asya ug Uropa.
(mannyrabacal1144@gmail.com)