APAS sumpay kini sa atong lindog kagahapon kabahin aning posibleng pag-recycle sa nakompiskar nga illegal nga drugas sa mga pulis ug Philippine Drug Enforcement Agency (PDEA) agents atol sa ilang mga operasyon. Kini nunot niining gi-ingon nga ‘ninja cops’ nga mobaligya pag-usab sa ilang nakompiskar nga illegal nga drugas.
Sa habig sa kapulisan dinhi sa dakbayan sa Sugbo, gibutyag ni Cebu City Police Office (CCPO) Director Col. Gemma Vinluan nga iyang pakap-kapan ang mga pulis nga naapil sa anti-illegal drugs operation inig pagka-human sa ilang operasyon sa ilang mga opisyal. Lain niyang himuon, dili niya pasul-ubon og mga karsones o sinina ang mga pulis nga dunay bulsa aron walay kataguan sa drugas kon gusto man nila kining kapnan.
Mora diay ning atong mga pulis og mga bagger sa supermarkets nga kap-kapan sa mga security guard kon sila mogawas. O morag mga empliyado sa pabrika aron masuta kon wala bay gisuksok o gikawat nga items gikan sa tindahan. Aber, kinsa man usab kuno ang mokap-kap? Ang ilang leader sa raiding team? Dili kaha magkasabot ang mga kanahan aron taguan ang ubang drugas? Basin ang leader maoy unang momando nga dili i-diga tanang nakompiskar.
Way bulsa nga sinina? Asa man intawon ibutang ang ilang mga armas o uban pang kinahanglanon atol sa raid o buy bust operation? Dili padalhon ni Vinluan og armas ang iyang mga tawo? Sus, kining mga pulis, mora pod na sila og kawatan nga maayo mobantay og mga awtoridad. Mangita pod na sila og pamaagi unsaon pag-counter kining pamaagi ni Vinluan.
Di kaha usab makapa-low moral kini sa kapulisan kay mogawas man nga wala nay pagsalig kanila ang ilang mga labaw ug publiko? Nagusbat na gyud ang imahin karon sa kapulisan gumikan sa pipila ka mga binoang. Ang angay himuon gyud aron malimpyo ning han-ay sa atong kapulisan, lutuson kining mga nakahimo og mga binoang aron matangtang sa serbisyo. Ang naka-porke kon gidudahan ang usa ka pulis nga nakahimo og binoang, i-re-assign ra sa laing lugar. Dili gihapon ma-disiplina. Gawas lang kon pamatyon. (bobbygnalzaro@gmail.com)