DUGAY nang napasagdan sa mga local government unit (LGU) ang mga manindahay sa mga sidewalk. Sud na kini sa pipila ka mga dekada nga problema, apan gipasagdan nga modaku tungod kay magamit man kini sa mga pulitiko isip instrumento panahon sa eleksyon.
Klaro kaayo nga nakalitan ug napugos ang local chief executives sa pagtuman sa mando ni Presidente Rodrigo Duterte tungod kay masilutan man sila sa Department of the Interior and Local Government (DILG) kon di sila motuman.
Wa silay dag-anan ug kapaingnan mao nga sila napugos sa pagtuman. Ning nahitabo karon, di ra ba si Duterte ang han-ukan sa kasuko sa mga vendor ug sa ilang mga pamilya, kon di ang mga mayor nga maoy nagpatuman sa clearing operations.
Mokanaug pa unya ang kaakuhan niini kay iadto na man sa mga barangay ang responsibilidad sa pagmintinar nga mapadayon ang kahawan sa mga sidewalk.
Nanginabuhi sa tinarong nga paagi ang vendors. Matag usa kanila dunay gibuhi nga pamilya. Dunay gipaeskwela nga gikinahanglan nga gastuhan. Apan nawagtang ang ilang panginabuhian.
Sakto man usab nga hawanan ang mga sidewalk kay alang man kini sa mga tawo, di alang sa pagpaninda. Apan kay nakulban man sa kulon kining mga tawhana, angay silang tabangan pinaagi sa paghatag og ayudang pinansyal kay labaw pa ni sila sa nasunogan human sila gihinginlan gikan sa mga asearas. Ilang panginabuhian ang nawagtang.
Kon nakagasto ang mga LGU og kwarta alang sa senior citizens ug sa mga nasunogan, nganong di man abagan ang kabos nga vendors nga naa sa atoang kadalanan? Ang ilang kinabuhi nagsalig sa tag peso nga halin matag adlaw aron dunay ikasustener sa inadlaw nga panglimbasog sa kinabuhi nga malisod.
Kalbaryo na daan ang ilang kinabuhi sa karsada. Unsa na kaha karon nga wa na silay panginabuhian?