USA ka adlaw niana, diha kos coffee shop sa dalang Guerrero ning dakbayan sa Davao. Nianang mga taknaa samtang gakuri kos akong mga files sa laptop kay nagbuhat kog grado sa akong mga estudyante, diha'y binabaye nga mikapakapa nga mihugyaw sa usa sab ka binabaye.
Nakurat ko gumikan gawas sa kulit kaayo siya sa paglabay og mga pulong ngadto sa binabaye nga iyang giduolan, dako pa gyod kaayo kini'g tingog.
Nabungkag ang kahilom sa coffee shop, gumikan milanog ang tingog diin ilang gihisgutan ang ilang mga educational attainment.
Tapad sa ilang lamisa, diha duha sab ka nag-table, ug sa akong tan-aw nagpadungog sila sa ilang mga naabot sa pagtungha.
Naputol sab ang akong gana sa pagtrabaho sa grado gumikan mopuyo gyod sa akong igdulongog ang iyang tingog.
Makaingon kog gabula lang ang iyang baba ug bisan sa pag-litok sa husto sa pinulungang bisaya, wa na kini nagkadima-o.
Sa pikas lamisa naa sab duha ka binabaye, ug nagtuo ko nga iya kadtong mga kaubanan kay mao sab ang ilang gihisgutan. Dako akong pagtuo nga magtutudlo sab.
Nakahinuklog ako sa kaugalingon nga kung daghan kag nahuman sa pagtuon mas daghan kag ikapanghambog? Hahaha.
Angayan lamang sab bitaw nga makapanghambog kita sa atong mga naabot sa kinabuhi, apan kinahanglan nga ibutang nato sa lugar; naa man go'y pipila nga gusto nila masayran sa ubang tawo ang ilang mga naabot.
Diha ko'y kauban nga magtutudlo, di gyod siya gusto mahisgutan ang iyang mga naabot sud sa dul-an upat ka dekada niyang pagpanudlo sa pampubliko nga tunghaan; ug sa panahon sa iyang pagretiro, nangaplay kini sa private school.
Suma niya nga sa iyang pagpangaplay, daw wa gyod katingog ang human resource (HR) office sa iyang gisumite nga dul-an tulo ka kilo nga mga credentials. Hahaha.
Nahimong kataw-anan namo sa faculty labi na kung dunay mga nangaplay ug nasayran nga tag napulo lang ka pahina ang ilang mga credentials.
Bisan sa dili ingon niini nga sitwasyon naa gyo'y batasan sa tawo nga kusog kaayong manghambog kung unsa ang ilang mga naabot. Pero miingon ang usa nga unsaon mana ang mga credentials kung wala gihapo'y nahut, buot pasabot, walay sapi.