STA. CRUZ, Davao del Sur - Napatay sa agalong negusyante ang usa ka 28-anyos nga lalaki samtang nihangyo og cash advance human nahitabo ang init nga lantugi sa kuwarta didto sa Sitio Tacub, Barangay Zone 1, alas 12:45 sa udto, Miyerkules, Oktubre 2.
Nailhan ang biktima nga mao si Ian Basas Pirote, minyo, laborer, molupyo sa Purok 2, Barangay Tinaungan, President Quirino, Sultan Kudarat.
Si Police Captain Mary Grace Martinez, hepe sa Sta. Cruz Police Municipal Police Station, nag-ila sa suspek nga mao si Danzie "Boyet" Buenacosa, 42, minyo, negusyante didto sa Saphire St. Bangkal, Davao City.
Sa inisyal nga imbestigasyon sa kapulisan, nasayran nga nagkalalis ang biktima ug suspek kalabot sa hisgutanang salapi nga niresulta sa pagkuha ni Pirote og tubo aron nga puspusan unta si Buenacosa apan napugngan sa laing kauban sa trabaho.
Nasayran nga ang biktima nag-trabaho sa usa ka tower nga gi-instalar sa National Power Corporation (Napocor).
Giingong mo-cash advance unta og dakong kantidad ang biktima sa iyang suweldo apan gihatagan lang og P3,000 sa agalon maong napungot kini.
Giingong nilakaw og kadiyot ang agalon, apan sa pagbalik niini, armado na og mubong matang sa armas ug way daghang istorya gipusil ang biktima sud sa makatulo ka higayon.
Matud sa kapulisan nga patay on the spot ang biktima kinsa naigo sa tuong bahin sa hita ug likod sa lawas nga nilapos sa dughan.
Human sa insidente, paspas nga mikagiw ang suspek sakay sa gipanag-iyahang ka kolor grey nga Toyota Hilux padung sa siyudad sa Davao apan narekober sa kapulisan ang sakyanan nga gibilin kilid sa dalan sa Davao-Cotabato national highway.
Gitaho nga nisakay, matud pa, ang suspek og habal-habal padung sa wa matinong direksiyon.
Narekober sa kapulisan sa crime scene ang tulo ka basiyong bala sa gituohang kalibre 9mm nga pistola.
Patay nga lawas sa biktima gihaya na sa usa ka punerarya sa lugar samtang gilusad sa kapulisan ang manhunt operation batok sa nisibat nga suspek kinsa gitakdang kasohan sa buhatan sa piskalya.