DISMAYADO si Police Regional Office-Davao Director Marcelo Morales sa pagkasignit sa usa ka pulis sa gihimong buy-bust operation niadtong Miyerkules sa gabii sa may Iñigo St., Barrio Obrero, Barangay 18-B, Davao City, Oktubre 2 sa gabii.
Sa report sa Talomo Police Station, mga dinakpan mao sila Glenn Art Laurel Muring alyas Dodong, 40 anyos, taga Buhangin sa siyudad nga giingong igsuon sa usa ka police official sa Davao City Police Office (DCPO), ug kauban nga si Police Staff Sergeant Elcelito Macarandan Colita, 35-anyos, nga nadestino sa Marilog PNP, residente sa Sasa ning dakbayan.
Sa presscon nga gihimo sa DCPO, Huwebes, gikasagmuyo ni Morales ang pagkalambigit sa mga nahisgutan sa hiwing binuhatan.
Nibahad ang opisyal nga patubagon ang pulis sa salaod nga nahimo, lakip sa imbestigahan ang igsuong pulis sa usa ka dinakpan.
Samtang gitaktak na usab isip hepe sa DCPO Personnel Department si Police Major Peter Jhon Muring ang igsuon sa suspek nga si Glen Art Muring nga kaubang naaresto ni Coleta.
Dugang pa nga imbestigahan si Major Muring tungod may tulubagon sab siya sa balaod sa ilegal nga kalihukan sa iyang igsuon.
Gimandoan sab niini si DCPO Chief Alexander Tagum nga ukayon ug patubagon ang hepe sa Marilog PNP nga wa kabantay sa gihimo sa iyang sakop.