SI PHILIPPINE Drug Enforcement Agency (PDEA) Director Aaron Aquino nibutyag niadtong Huwebes, Oktubre 3, nga si Philippine National Police (PNP) Chief Oscar Albayalde nihangyo kaniya sa di pagpatuman sa dismissal order batok sa 13 ka mga pulis sa Pampanga nga gipang-akusahan nga ninja cops.
Sa pagpadayon sa Senate investigation sa good conduct time allowance (GCTA) system ug ninja cops niadtong Huwebes, si Aquino niingon nga si Albayalde, kinsa mao ang National Capital Region Police Office (NCRPO) officer-in-charge, nanawag kaniya niadtong tunga-tunga sa 2016 aron mangutana kabahin sa kaso batok sa 13 ka mga pulis.
Si Albayalde giingong wa lang mangutana kabahin sa status sa kaso apan nisuway usab sa pagsanta sa pagpatuman sa kamandoan sa pagtaktak.
“Sir, baka pwede huwag mo muna i-implement ang order,” kutlo ni Aquino sa sulti ni Albayalde.
“Bakit, Oca (angga ni Albayalde?,” paghinumdom ni Aquino sa sulti.
“Kasi sir, mga tao ko sila,” giingong maoy sulti ni Albayalde.
“Oca, ipapa-review ko sa legal ang kaso nila pero ipapatapon ko muna sila sa Mindanao,” paghinumdom ni Aquino sa sulti ni Albayalde.
Si Albayalde sa sayo pa nanghimakak nga nisuway siya sa pag-impluwensya sa dismissal order, apan niangkon nga nitawag siya kang Aquino kalabot sa status sa kaso.
Matod sa PNP chief nga wa siya sa posisyon sa paghangyo kang Aquino, kinsa iyang upperclassman, sa pagpugong sa dismissal order.
Ang 13 ka police officers mao sila si Superintendent Rodney Raymundo Baloyo IV; Senior Inspector Joven de Guzman Jr.; Senior Police Officers 1 Jules Maniago, Donald Roque, Ronald Santos, Rommel Vital, Alcindor Tinio and Eligio Valeroso; Police Officers 3 Dindo Dizon, Gilbert De Vera, Romeo Guerrero Jr. and Dante Dizon; ug Police Officer 2 Anthony Lacsamana.
Ang ninja cops mao ang mga pulis nga mo-recycle ug mobaligya sa illegal drugs nga nasakmit sa lehitimong anti-drugs operations.
Anti-drugs operation
Ang 13 ka mga pulis apil sa November 29, 2013 anti-drugs operation sa Woodbridge Subdivision, Lakeshore View sa Mexico, Pampanga. Si Albayalde mao ang Pampanga police provincial director niadtong higayuna.
Sila nideklarar nga nakasakmit og 38 ka kilo sa shabu dihang ang giingong kinatibuk-ang nasakmit moabot og 200 ka kilo base sa gipangsulti sa daghang mga saksi, sulti ni kanhi Criminal Investigation and Detection Group (CIDG) director ug karon Baguio City Mayor Benjamin Magalong sa Senado. (SunStar Philippines)