DUHA ka sakop sa iladong fraternity ang nasikop human nga nasakmitan og mga ilegal nga drugas atol sa gihimo nga buy-bust sa kapulisan sa Siyudad sa Talisay.
Ang nasikop mao si Sidore Brett Mancao, 24, taga Sitio Quadra, Barangay Lagtang, syudad sa Talisay.
Si Mancao maoy subject sa operasyon.
Lakip sa nasikop ang tag-iya sa panimay diin gihimo ang operasyon nga mao si Ryan Bacus Duguran, 24.
Gihimo ang operasyon sa Purok Alisto, sitio Kalubihan, Tabunok, Talisay niadtong Miyerkules sa gabii, Oktubre 2
Si Police Captain Nazarino Emia, deputy chief sa Talisay City Police Station, nitug-an nga nitumaw ang ngalan ni Mancao gikan sa ilang mga nangasikop na.
Apan pasangil sa kabanay ni Duguran nga naangin lang sa ilegal nga kalihukan ang dinakpan, tungod kay ka-‘brad’ o kauban sa fraternity niini si Mancao, kinsa maoy punterya gyud sa mga pulis.
Atol sa operasyon, ang duha nakuhaan og usa ka medium pack ug 29 ka gagmay nga pakete.
Matud sa Talisay police nga usa na kini sa ilang susihon karon kon gigamit ba ang fraternity diha sa pagpamaligya sa gidiling drugas o sa bisan unsa nga ilegal nga mga negusyo. (FMD)