ISIP parte sa selebrasyon sa Teacher’s Day karong Sabado, Oktubre 5, makadawat og tag P1,000 ang 65,000 ka mga magtutudlo sa Central Visayas human niluwat og Department of Education (DepEd) order 26 si Education Secretary Leonor Briones nga naghatag og incentive sa mga magtutudlo lukop nasod.
Matod ni DepEd 7 Regional Director Salustiano Jimenez nga posible nga karong adlawa, Oktubre 4, o ugma na, madawat sa tagsa-tagsa ka mga ATM ang incentive.
Mao kini ang labing una nga aduna’y incentive nga gihatag ang DepEd ngadto sa mga magtutudlo subay sa Annual Teachers Day.
Karong Oktubre 5, mao usab ang uwahing adlaw alang sa selebrasyon sa World Teachers Month diin nagkadaiyang mga aktibidad ang pagahimuon sa nagkadaiyang schools division.
Sa Central Visayas, dunay 19 ka schools division diin 10 niini sa Sugbo, 6 sa Negros Oriental, 2 sa Bohol ug 1 sa Siquijor.
Tanang mga public school teachers ra ang makadawat.
Giangkon usab ni Jimenez nga matag tuig na kining problema sa kakuwang sa magtutudlo tungod sa nagkasaka usab nga gidaghanon sa mga tinun-an matag tuig.
Moabot na sa 4-5 milyunes ang enrolees karong tuiga sa public ug private schools. (HBL)