NANG-alma ang regular nga mga empleyado sa Lapu-Lapu City Hall nga gilabay sa mini city hall sa Brgy. Talima, Isla sa Olango.
Kini human nga giingong wa silay trabaho sa mini cityhall kun dili ang mo-punch-in ug mo-punch-out matag adlaw.
Matod ni Rolando Duero, kanhi pangulo sa General Service Office GSO sa administrasyon ni kanhi Lapu-Lapu City Mayor Paz Radaza, nga sukad sa Hulyo 1, sa mini city hall na siya nag-duty human nilingkod usab si Lapu-Lapu City Mayor Junard “Ahong” Chan.
Alang kaniya dili kini makiangayon. Gawas kaniya, aduna usay laing pito ka mga empleyado sa nagkadaiyang departamento sa city hall kaniadto nga atua na usab gi-assign sa mini city hall uban ni Duero.
Alang kang Duero, di makiangayon ang ilang pag duty sa mini cityhall sanglit wa silay trabahuon gumikan kay wa kini mag function.
Gawas pa niini, hago usab sa ilang bahin ang paglabang-labang sa isla matag adlaw. Tinuod man tuod nga nagdawat sila sa ilang naandang suweldo ug benepisyo, apan di kalikayan nga bation siya og konsensya sanglit kwarta kini sa katawhan.
Mihangyo
Pila na usab siya kahigayon mihangyo ni Chan nga unta mausab ang huna-huna niini nga ibalik siya sa Lapu-Lapu City Hall sanglit andam siya motabang ug mosuporta sa administrasyon, apan wa pa gisanong ang iyang hangyo.
Kon ugaling di siya mabalik sa pag duty sa city hall, plano na niyang mosuwat sa Civil Service Commission (CSC).
“Wala gyud mi buhaton diri. Ing-ani lang huwat og oras nga mouli. Adto gyud ta ko didto (sa mainland) kay naa man didto ang problema gyud. Oversee the administration as GSO. Unfair ni sa taxpayers kay wa man mi gitrabaho,” matod ni Duero.
Si Lapu-Lapu City Mayor Junard “Ahong” Chan, sa iyang bahin, nibutyag nga gituyo niya og butang si Duero ug ubang empleyado sa city hall ngadto sa mini city hall sa isla sanglit sukwahi sa miaging administrasyon, iya na kining ipa-fully functional.
Iyang nakita ang katakos ni Duero nga mangulo sa pag-atiman sa mga problema unya sa mini city hall isip pangulo sa GSO kaniadto. “Kinahanglanon siya sa isla since ang atong Olango nga mga kaigsuonan atong gisaaran nga tagaan nato og serbisyo. So, mas maayo sad iya matutokan and matan-aw niya iyang mga panginahanglanon nga iyang irekomendar sa atoa,” matod ni Chan. (GCM)