NAGDUDA ang inahan ni Jouie Lee Villagonzalo, call center agent nga gituohang gi-salvage, nga mistaken identity ang nahitabo sa iyang anak.
Ang lawas ni Jouie Lee napalgan sa sityo Kabaasan, Barangay Tagbao, bukirang dapit sa Siyudad sa Sugbo, niadtong Miyerkules sa buntag, Oktubre 2.
Matod ni Jocelyn Villagonzalo nga niadtong Lunes sa gabii, nananghid sa iyang bana nga si Louiesito si Jouie nga moadto sa balay sa iyang barkada sa Barangay Capitol.
Human didto modiretso na usab kinig kuha sa live-in partner nga si Iznairah Chiong, 23, usa usab ka call center agent sa Banawa, Barangay Guadalupe, Siyudad sa Sugbo.
Apan natingala sila dihang gipahibawo ni Chiong nga wa moabot sa iyang trabahoan si Jouie nga unta mao kini ang routine sa biktima.
Ilang gitawgan ang cellular phone apan di na ma-contact.
Ila usab nga gipadalhan og mensahe ang messenger sa Facebook apan wa mo-reply.
Superbalita fb page
Sukad niadto nabalaka na sila kon unsay nahitabo sa iyang anak.
Hangtod nga nakakita ang iyang bana nga si Louiesito sa Facebook page sa Superbalita Cebu nga adunay napalgang lawas sa Tagbao.
Dali sila nga niadto sa Cebu City Police Office ug sa Scene of the Crime Operations (Soco) sa dalan Gorordo aron makisayod sa insidente.
Ilang nakompirmar nga ang napalgang patayng lawas kang Jouie.
Gitug-an ni Jocelyn sa Superbalita Cebu nga di pa tantong dugay ang iyang anak nga nagtrabaho sa usa ka call center company nga naa nahimutang sa IT Park.
Paspas kaayo ang promotion niini sanglit sulod lang sa usa ka tuig nahimo na dayon siyang supervisor gikan sa yanong call center agent.
Wa usab siya makabantay nga mogamit kinig illegal nga drugas tungod kay inig kahuman sa trabaho, modiretso ra kini sa balay sa Barangay Sambag 2.
Matag gabii kuhaon si Chiong sa trabahoan.
Adunay higayon nga gipangutana niya kini kon maggamitan ba kinig illegal nga drugas human makadungog sa balita nga adunay mga call center agent nga nangadakpan tungod sa paggamit ug pagpamaligya sa illegal nga drugas.
Apan hugot kining mihimakak, matod ni Jocelyn. Gani mibutyag kini nga adunay random drug test ang ilang kompanya ug dili mahimong mogamit kinig illegal nga drugas tungod kay pinangga kaayo sa iyang anak ang trabaho.
Wa usab siya makadungog nga adunay kontra ang iyang anak. Dako ang iyang pagduda nga nasaypan lang ang iyang anak.
Bisan si Chiong niingon nga buotan si Jouie ug wa siya makadungog nga dunay gikaaway.
Wa usab kini mosulti nga dunay nasuko kaniya.
Nagtabang
Si Jouie ang kinamaguwangan sa tulo ka mga magsuon.
Niabag kini sa gasto sa ilang pamilya ug pagpaeskwela sa mga manghod niini.
Gidugang ni Jocelyn nga aduna pa untay plano si Jouie sa iyang mga manghod apan tungod sa kamatayon, napawong ang pangandoy.
Wa pa silay gipangdudahan sa pagkakaron kon kinsa ang nagpatay, apan iyang panghinaot nga makonsensya ang naghimo sa krimen.
Alang niya hipokrito na kaayo siya nga manawagan sa kapulisan sa siyudad sa Sugbo nga sulbaron sa labing dali nga panahon ang kamatayon sa iyang anak.
Apan ang iyang pangaliya nga makonsensya lang ang nagpatay.
“Ang ako lang, gamay ra kaayo ang porsiento nga manawagan kog justice kay daghan na man kaayo kong nakita nga ingun ani nga koan nga wala man gihapon masulbad. Wala man gihapoy justice. Ang ako na lang pangayuon nga hope against hope nga malamdagan intawon ang nag buhat (nagpatay) sa akong anak, nga mo explain sa akoa ba ngano? Wala man ni kontra ang akong anak. Unsa may rights niya nga iyang patyon akong anak?,” matod ni Jocelyn sa interbyu sa Superbalita Cebu.
Ang amahan sa biktima nga si Louiesito maoy chief barangay tanod sa Sambag 2.
Si Sambag 2 Barangay Kapitan Ryan Aznar nitug-an usab sa Superbalita Cebu nga way record sa ilang barangay si Jouie Lee nalambigit sa illegal nga drugas.
Anggulo
Si Police Colonel Gemma Vinluan mimando sa Talamban police station pagpalawom pa sa ilang imbestigasyon. Gitan-aw karon nila ang anggulo sa love triangle, personal nga atraso ug posibling kalambigitan sa illegal nga drugas.
Iya usab nga gimandoan ang Talamban police station nga makig hinabi sa kabanay sa biktima aron masuta nila kon unsay back ground ni Jouie Lee.
Nakurat si Vinluan sa pamaagi sa pagpatay diin gigapos ang mga tiil ug mga kamot ug gipusil ang ulo sa biktima.
“Titingnan natin ang different angle. Sa ngayon wala pa akung specific na facts kung anong reason behind that. Maaring different reasons, work related, pwedeng sa love, pwedeng involvement din sa drugs. So we will check yung lahat na aspeto na yan,” matod ni Vinluan.
Gidudahan ni Vinluan nga gilabay lang sa dapit ang lawas ni Jouie Lee ug taodtaod nang patay sa dihang napalgan sa usa ka motorista nga nanimaho na.
Adunay samad pinusilan sa lawas ang biktima nga maoy hinungdan sa iyang hinanali nga kamatayon.
Pagka Huwebes sa udto nakahukom ang pamilya nga Gonzalo nga ipa-cremate kini nga gitambungan sa iyang mga suod nga higala ug pamilya.