PASADO na sa komitiba sa edukasyon sa konseho sa Dakbayan sa Ormoc, Leyte ang ordinansahon nga maghatag og scholarship niadtong buot mag doktor ug abugado.
Sila si City Councilor Nolito Quilang, Lalaine Marcos, Jasper Lucero ug Gerry Penserga ang nihisgot niini uban sa mga department heads Huwebes, Oktubre 3, 2019.
Matod ni Quilang, pipila ka punto ang ilang gihisgutan atol sa committee meeting.
Nag-una niini ang pakig-alayon nila sa mga State Universities and Colleges diin buot nila nga ma-enroll ang mga tinun-an sa maong tunghaan kay libre na ug di na kaayo madak-an ang kagamhanan.
Gihisgutan usab ang counterparting diin kung ang pamilya sa tinun-an medyo arangan dunay share sa gastuhan bisan ginagmay lang.
"Amo sab na gihisgutan nga if naa counterpart ang estudyante mo gamay ba ang years sa iyang pag serbisyo sa syudad kung ma doktor na siya o abugado" pasabot ni Quilang.
Giklaro usab ni Quilang nga wala sila mag-require og average sa tinun-an basta kay di lang kini mahagbong.
Dugang ni Quilang, nga si Dr. Edmund Keirulf sa City Health niingon nga kun mahimo na nga doktor, dili itugot ang residency training o mag specialize kay basin di na mo balik kay dako ang ilang professional fee nga madawat.
"Human nila mahimo nga doktor ug abugado moserbisyo sila sa syudad" matod ni Quilang.
Kun ang tinun-an gipa-eskwela og duha ka tuig sa syudad, upat ka tuig siya nga magserbisyo sa syudad.
"Atleast makasuporta ta og duha ka scholars sa medicine, law ug dentistry kada tuig" matod ni Quilang.
Base sa draft ordinance, gawas sa tuition fee, ang tinun-an makadawat usab og P25,000 nga book allowance; P20,000 nga tablet (gadget) allowance; P6,000 nga clothing allowance; P10,000 board and lodging; ug P3,000 alang sa miscellaneous fee.
Dugang ni Quilang, kun gikan sa kabus nga pamilya ang estudyante, himuan kini og case assessment certification sa City Social Welfare and Development (CSWD).
"Aside sa nahisgutan nga mga allowance, if gikan sa poor family ang estudyante, himuan siya og case assessment sa CSWD and duna siya additional nga P10,000 allowance" matod ni Quilang.
Gikatakda nga tukion sa plenaryo alang sa unang pagbasa ang maong ordinansahon. (JKDP)