LAWOM nga imbestigasyon ang gihimo sa kapolisan human napalgang patay ang usa ka babaye sulod sa usa ka lawak sa Homewood Pensionne House sa lungsod sa Opol, Misamis Oriental.
Ang biktima naila pinaagi sa identification card niini nga mao si Marian Samera Pangcatan, taga Gasi, Laguindingan, Misamis Oriental.
Sa inisyal nga imbestigasyon sa kapolisan, mao na lamang nadiskubre sa mga trabahante nga wala nay kinabuhi ang babaye nga napalgang gigapos gamit ang pisi nga gikan sa bedsheet samtang wala nasab kini sapot ang ubos nga bahin ug adunay mga lagom sa nagkadaiyang parte sa kalawasan.
Matud sa mga personahe nga nag-check-in sa gabii niadtong Miyerkules, Oktubre 2, si Marian kuyog ang usa ka lalaki nga maoy nagbayad ug gibutang lang ang pangalan nga "Junrey'.
Namatikdan sa closed circuit television camera (CCTV) nga walay nakitang pinugos ang ilang pagsulod ug gitouhang adunay relasyon ang duha, ug nakita sab sa CCTV ang pagawas sa lawak lalaki.
Dihang giingong milapas na sa oras gituktok kini sa mga personahe ug dihang wala mitubag ilang giablihan, ug mao kini ang ilang nadiksubre nga wala nay kinabuhi ang biktima.
Gitouhan sa kapolisan nga gitouk ug gidagmalan ang biktima maoy hinungdan sa kamatayon niini.
Sa pagsulat ning balita, gidala na sa Bollozos funeral parlor ang biktima ug padayong gipangita ang ka check in niini.