SIKOP ang usa ka lalaki human gisuwayan og dagit ang 9-anyos nga batang babaye mga alas 4:30 sa hapon niadtong Miyerkules, Oktubre 2, sa Zayas, Barangay Carmen, Dakbayan sa Cagayan de Oro.
Arestado si Nicholson A. Penaso, 32, ulitawo, taga Carmen.
Ang biktima nga itago na lamang sa ngalan nga mao si Jane, taga Macabalan, nisaysay sa kapolisan nga gikan siya sa Limketkai area ug gipugos kini sa suspek pagpasakay sa sakyanan ug gidala sa wala matinong lugar.
Hangtod nga gipasakay kini sa motorela kon asa ilang nakasakay ang usa ka Jane Olamit nga nakamatikod sa aktwasyon sa bata nga nagsige og hilak.
Tungod sa kadudahang lihok sa suspek ug pagsukit-sukit niini sa biktima, nagpatabang si Olamit sa mga habal-habal driver ug barangay tanod hinungdan gikostudya kini ug gi-turnover sa kapolisan.
Sa pagkakaron, balhog sa prisuhan sa Police Station 4 (PS4) sa Carmen ang suspetsado kinsa gitakdang pasakaan og kaso.