NAGTUO ang bantugang Sugbuanong bilyarista nga si Warren Kiamco nga makasugat og malisod nga kompetisyon ang RP national billiard team sa nagkaduol nga 30th Southeast Asian (SEA) Games.
Gipasabot ni Kiamco nga ning-umento na’g dako ang abilidad sa mga bilyarista sa ubang mga nasod sa southeast asia dili sama kaniadto nga manghawod lang kanunay ang mga Pinoy.
Si Kiamco nahilakip sa lima ka mga magduduwa nga naglangkob sa RP team nga modumbol sa SEA Games nga ipahigayon dinhi sa nasod sugod karong Nobiyembre 30.
Kauban ni Kiamco sa national team mao sila si Carlo Biado, Dennis Orcollo, Jeffrey Ignacio ug Juhann Chua.
Si Kiamco, kinsa lumad nga taga Pasil, Cebu, moduwa sa duha ka events: 9-ball singles ug 9-ball doubles sugod karong Disyembre 10 sa Manila Hotel.
Ang nangahisgutang mga magduduwa mao ang ningpatigbabaw sa sunodsunod nga qualifying events nga gipasiugdahan sa Billiard Sports Confederation of the Philippines (BSAP) nga maoy nagsilbeng basihan sa pagpili og mga magduduwa nga molangkob sa RP Team.
Si Kiamco kasamtangang ania sa Sugbo isip usa sa mga partisipante sa Sargo sa Cebu City Open 10-Ball BilliardTournament sa Robinson’s Gallera. (RSC)