PAREHONG mosuway paglangkat sa ilang ikaupat nga sunodsunod nga kadaugan sa samang gidaghanon nga mga duwa ang magsuong puwersa sa TNT KaTropa ug NLEX Road Warriors sa ilang pagpakigbatok og lainlaing kontra karong gabii sa Philippine Basketball Association (PBA) Governor’s Cup conference.
Ang KaTropa makigbatok sa nagkakuyaw nga Columbian Dyip sa main game sa mga duwa nga ipahigayon sa Ynares Center sa Antipolo City sugod karong alas 6:45 sa gabii.
Samtang ang Road Warriors makigkontra sa Brgy, Ginebra Gin Kings sa out-of-the-country nga kombati sa Coca Cola Arena sa Dubai.
Ang KaTropa gikan sa makutas nga kadaugan batok sa Phoenix Pulse Fuel Masters, 123-118, niadtong Miyerkules sa usa ka kombati nga grabe ang pinuntosay.
Ningdaog man tuod ang KaTropa ning sangkaa apan wala makauyon ang ilang coach nga si Bong Ravena nga nakaabot og 118 puntos ang Fuel Masters.
“We gave away 118 points, wala kaming tataluning malakas na team kapag ganyan,” matod ni Ravena sa PBA.PH. “We have to improve. We can’t play the same way. We have to be consistent on our defensive effort.”
Gusto si Ravena nga makakita siya og umento sa ilang depensa sa ilang pagpakigbatok sa Dyip, nga adunay 2-1 nga rekord.
Ang Dyip gikan nga nakaligis sa NorthPort Batang Pier, 114-108, nga maoy nakapabarog og balik sa ilang moral.
Ang Batang Pier mosuway og bangon gikan sa ilang kapildihan batok sa Dyip pinaagi sa pagpakigbatok sa Blackwater Elite sa premirong duwa sa Ynares Center.
Ang Batang Pier adunay 1-2 nga rekord samtang ang Elite wala pa’y daog sulod sa duha ka mga duwa. (ESL)