WALA pa gani matak-ang ang laraw nga impeachment gibaharan nga ipadakop ug ipapriso ni Pres. Rodrigo Duterte. Dugtong sa daghang mga lakang pagpalagpot sa katungdanan. Sila si Supreme Court Senior Associate Justice Antonio Carpio, kanhi Ombudsman Conchita Carpio-Morales, kanhi DFA Sec. Alberto del Rosario, ACT Teachers Rep. Antonio Tinio sa Macabayan bloc, Maritime Expert Jay Batongbacal ug Pro-LP gangs nangusog nga pasakaan og impeachment si Duterte nga nakalapas sa konstitusyon pagtugot sa China pagpanagat sa West Phil. Sea o South China Sea nga sakop sa Pilipinas basi sa hukom sa United Nations Arbitral Tribunal sa 2016. Apan wala motahod sa hukom ang China maong wala katuldoki og kasulbaran ang maong isyo. Gani sila si del Rosario ug Morales gipugngan sa tugpahanan sa Hongkong nga trading partner sa Mainland China sanglit mikiha kaniadto ni Chinese Pres. Xi Jinping ngadto sa International Criminal Court og crime against humanity tungod sa gibuhat sa West Phil. Sea.
Nahaling pagbalik sa dihang barkong panagatan sa China nga giingong mibangga sa panagatan sa Pilipinas sa Reed Bank o Recto Bank nga tugob sa isda, lana, gas ug ubang minerales. Gusto sa mga kritiko nga ipagubat ang China apan wala magpadala si Duterte kay naghulat sa resulta sa inbestigasyon nga ang sad-an maoy pabayron kaysa gubaton.
Ang 1987 Constitution nagmando nga protektahan ang mga bahandi sa kadagatan ubos sa Exclusive Economic Zone (EEZ) ug maoy makatagamtam lamang ang mga Pilipino. Souvereignty nga kitay tag-iya sa propiyedad ug sovereign right nga kita ray makapahimolos. Apan ingon og dili perpekto nga siyensya ang balaod kay sa United Nations Convention on the Law of the Sea ug international law ang fish resources dili matimongmong pag-angkon sa coastal state. Gani nagmando nga mopagawas og kasabotan sa ubang nasod. Si Duterte mitugot sa China sa pagpanagat sanglit managhigala. Dili usab makapugong kay padayong miangkon sa West Phil. Sea bisan og duna nay hukom nga iya sa Pilipinas. Kon ipamugos ang souvereign right mosangpot sa gubat. Ang konstitusyon walay kahulogan kon moulbo ang kagubot. Sa gubat walay mananaog ang tanan polos biktima. Katungod ni Duterte ang pagprotihir sa nasod ug sa 110M ka mga Pilipino.
Hinoon duna nay duha ka diplomatic protest ang gipasaka sa Pilipinas batok Beijing ug China gumikan sa mga warships nga milaboy sa kalaworan sa Pilipinas lakip na sa Sibuto strait. Sugyot nga joint exploration maoy malinawong kasulbaran. (csa_1156@yahoo.com/09064648954)