GOOD Sabado morning !!! Kumusta po? Ako, medyo katulugon tungod sa tambal nga akong ginainom. Dali ra man god mangagid ning inyong amiga bisan sa pagkaon og pasayan, itlog, ginamus, uyap ug uban pa. Paglikay ang unang solusyon apan kung matintal- motumar rag tambal.
Anyway, sama ninyo, daghan pod kog mga pangutana sa life. Anaay mahitungod sa kaugmaon, mga matang nga makakunsumisyon,ug apil na syempre ang mga tinguha sa life ug ambisyon.
Nagatuo ako nga ang tanang pangutana; anaa gayuy gitaganang katubagan apan dili klaro kung kini makapakulba o makapalipay nato. Usahay mas nindot kuno nga dili na sayron ang mga tubag aron dili kita madismaya.
Sulayig tubag ning akong gilistang pangutana diin ang uban nabati ra sa kantag mga tsismosa apil katong anaa sa salida. Una, kinsay imong piliong makauban sa tibuok kinabuhi, ang nahigugmag hugot kanimo apan wa kay pagbati niya o ang pinitik gayud sa imong dughan apan kaniya ikaw baliwala lang?
Ikaduha, nahigugma ba ka sa imong partner tungod matagboniya ang imong panginahanglanon (salapi, emosyon ug atensyon) o nahigugma ba gayud ka niya bisan wala sya madalit bisan unsa kanimo (purong gugma ra gayud).
Ikatulo, kung mamatay ka karon, asa kaha imong kalag padulong, sa langit sa himaya o sa walay undang nga pag antos didto sa impyerno?
Unsa diay ang kaluwasan? Kini nagtuyok sa konsepto sa atong pagkamasasala ug ang hugot nga gugma sa Dios diin Iyang gipadala ang bugtong anak nga si Hesu-Kristo aron limpyohan kita sa tanan natong sala. Pinaagi sa pagpangayog kapasayloan ug pagdawat kang Jesus sa atong mga kinabuhi, ang atong mga kalag mahilangit.
Kagahapon, samtang nagatan-aw ko sa telebisyon sa ospital kauban ang akong lola ug uban pang mga pasyente, ang artista nagkanayog, "salamat Doktora Vicky Bello." Ang bana nangutan sa iyang asawa kung nganong magpasalamat kang Bello. Tubag sa asawa, "si Dok Bello man ang nagapagwapa nila." Tubag sa bana," sya ang nagapagwapa sa mga artista? Dili man lagi sya gwapa?" Wala na nakatubag ang asawa. Unsay tubag ninyo?
Seriously, nanguta pod kanako ang uban nakong friend nganong dili nako ginatubag sa cellphone ang ubang nagatext ug nagtawag. Ingon nako kay ang uban kanila manawag lang man god kung naay ipabuhat kanako. Dili na pod nako ginatubag ug ginalikayan na ang mga tawo nga walay klaro nga kasabot.
Lisod man god kung makigsabot kita unya ang atong kaistorya dili motunong-makaguba'g dughan. Maayo pa lagig wala aron wala pod tay laing hunahunaong. Wala man ko nalagot ug nagdumot, naglikay lang aron likay sa problema, Getch???
Taas pa akong listahan apan wa na kitay ispasyo, higala -- sorry. Nasayod ko nga managkalahi ang mga tubag nato depende sa kalalum sa atong salabotan ug kadaghan sa atong naeksperyensyahan sa kinabuhi. Wala may maling tubag. Importante lamang nga sa atong mga tubag wala kitay intensyon nga makasakit sa ubang tawo, igsuon. Bye, see you soon!!!