NIHANGYO si Lapu-Lapu City Mayor Junard “Ahong” Chan sa Maritime Industry Authority (Marina) 7 nga kon mahimo di na lang estriktuhon pagpatuman ang pagpailis og fiber glass sa nagbiyaheng mga motorbanca sa mainland sa Dakbayan sa Lapu-Lapu ug isla sa Olango.
Sa pagkakaron ang nagbiyahean nga mga motorbanca sa isla sa Olango ug mainland Lapu-Lapu pulos ginama sa kahoy.
Niadtong Martes, Oktubre 1, nakigtagbo ang gatusan ka mga motorbanca operators uban ni Chan sa kadagkuan sa Marina-7 aron ipadangat ang ilang yangongo sama sa kamahal sa pagpahimo og fiber glass nga motorbanca.
Alang kang Chan, dili susama sa ubang dapit nga adunay magbiyahean nga mga motorbanca isip paagi sa transportasyon sa katawhan, ang biyahe sa mainland paingon sa isla sa Lapu-Lapu, molanat lang og 15 minutos.
Buot pasabot niini nga duol ra kaayo ang distansya sa biyahe hinungdan nga di kaayo kini delikado biyahean bisan kon ginama lang sa kahoy ang mga motorbanca.
Base usab sa record, way dakong trahedya sa kadagatan nga naglambigit sa mga motorbanca nga magbiyahean sa isla ug mainland Lapu-Lapu.
Mas pabor usab ang mga operator nga magpabiling kahoy ang ilang mga motorbanca sanglit kon adunay trahedya gumikan sa kabati nga dagan sa panahon, di kini hingpit nga maunlod itandi sa fiber glass.
Gibutyag hinuon ni Chan nga mas estriktohon sa Marina 7 ang paghimong fiber glass sa mga motorbanca nga pasaheroan kay sa sa pangturista.
“Ang uban sa atong kaigsuonan dili pa gyud andam ana and lisod sad sa part sa city government kay wala mi ikahatag pa nga alternatibong panginabuhian para sa maapektohan. I think the Marina ila tong ipadala sa ilang national office for reconsideration,” matod ni Chan kalabot sa iyang hangyo.
Kon ugaling di mosanong ang Marina-7 sa hangyo ni Chan, hayan mohangyo lang usab ang mayor nga kon mahimo iangan-angan lang ang pagpatuman niini. (GCM)