DAKONG kasubo ang gibati sa pamilya sa usa ka mag-uuma nga giunay'g patay sa iyang manghod nga lalaki sa Purok Jacinto, Barangay Coronobe, Maragusan, Compostela Valley alas 8:30 sa gabii, Miyerkules, Oktubre 2.
Ang biktima giila nga mao si Marjun Lumikid Magkidong, 32, ulitawo, mag-uuma, samtang ang gitumbok nga suspek nailhan sa pangalang Sannyboy Lumikid Magkidong, 30, parehong molupyo sa Purok Jacinto, Barangay Coronobe.
Sa report nga nakuha gikan sa Compostela Valley Police Provincial Office, nasayran nga mga personahe sa Maragusan Emergency Response Team (MERT) niabot sa Maragusan Municipal Police Station ug nitaho kabahin sa maong hitabo.
Dali sab dayong niresponde ang kapulisan ug gisusi ang hitabo.
Base sa inisyal nga imbestigasyon, ang suspek nagtagay og ilimnong makahubog sa balay sa iyang uyoan nga wa madugay niadto sa balay sa iyang iyaan ug gikuha ang homemade shotgun nga gitawag og bukakang nga gibutang ilalom sa kabinet sulod sa kuwarto.
Wa madugay, ang suspek masuk-anong nisulong sa balay sa biktima nga iyang maguwang ug nag-"wild" ug gisinggitan nga mogawas sa balay ang biktima.
Wa nadugay, nigawas ang biktima sa balay ug giduol ang suspek.
Apan gilaparo siya sa suspek ug gipusil tumong sa tuong bahin sa tiyan.
Human sa krimen, yano lang nga nilakaw palayo ang suspek paingon sa Purok Mandayan ug nitahan ngadto kang Purok Leader Nolan Subayno sa Barangay Coronobe.
Samtang ang biktima gidala ngadto sa Compostela Valley Provincial Hospital-Maragusan sa pamasin nga masalbar pa ang kinabuhi apan gideklarang dead on arrival sa doktor.
Narekober gikan sa crime scene ang homemade shotgun nga gigamit sa suspek sa pagpatay sa kaugalingong igsuon.
Bangi sa yuta ang gitumbok nga hinungdan sa krimen.
Ang suspek gikustodiya sa Maragusan Municipal Police Station.