MGA mamaligyaay og karne sa Siyudad sa Talisay subling gi-warningan sa Talisay City Veterinary office nga di mamaligya og karne ug pork-related nga mga produkto.
Nasuta sa buhatan nga dunay mga establisemento nga padayong naninda og pork products nga gikan sa Luzon.
Huwebes sa hapon, Oktubre 4, nihimo og surprise inspection ang mga sakop sa African Swine Fever (ASF) taskforce ug meat inspector sa Talisay City Livestock and Poultry Center sa mga supermarket ug kamerkaduhan.
Lakip sa gituyo nila ang Tabunok public market ug meatshops sa Barangay Bulacao ug Tabunok.
Nasuta nga daghan pa sa mga produkto nga hinimo gikan sa mga karne sa baboy nga gi-manufacture o naggikan sa kaulohan, sa bisan asa sa Luzon area. Subli nga nipahimangno ug nihangyo ang task force sa mga tag-iya nga i-pull-out ang mga produkto ug ipabalik ngadto sa ilang tinubdan.
“Nasuta nga naay mga pork-related products, naay mga toccino , hotdogs ug canned goods nga gikan sa Luzon, nga ila pa gihapon gipangbaligya,” saysay ni Dr. Mary Thessa Loraine Alo, Talisay City veterinarian.
Kini nga mga produkto nalakip sa executive order nga gipagawas ni Gobernador Gwendolyn Garcia kalabot sa pag-ban sa mga baboy ug karne niini ug mga nalambigit nga produkto nga gikan sa Luzon sulod sa 100 ka adlaw.
Kini human masuta nga dunay outbreak sa ASF sa pipila ka bahin sa Luzon.
Ang mga karne nga gikan usab sa ubang dapit sa Pilipinas gikinahanglan nga dunay kompletong mga dokumento una pa tugtang makasulod dinh sa Sugbo.
Matod ni Alo nga ilang gihatagan og 10 ka adlaw ang mga manindahay sa pag-pull out sa mga gibaligya nga pork products nga gikan sa Luzon.
Pasabot ni Alo nga pahimangno na kadto sa mga tag-iya nga sila na mismo ang mo-pull out sa maong mga produkto.
Sa sunod nga pagsusi, kon masakpan gihapon ang susama nga mga tindahan nga namaligya, sakmiton na kini sa awtoridad, ug malakip na niadtong mga pangsunogon.
“Gi-advisan sila (manindahay) ipa-pull out. Gihatagan na sila og 10 days para sa voluntary og pull out ug i-ship back ngadto sa ilang supplier. According sa taskforce, og naa gihapon sila display, pwede na ni i-confiscate,” dugang ni Alo.