SIYAM ka ninja cops sa Central Visayas nga nagpositibo sa paggamit sa illegal nga drugas gipang dismiss na sa serbisyo sa Philippine National Police (PNP) sukad milingkod sa katungdanan si Police Regional Office (PRO) 7 Director Brigadier General Debold Sinas.
Ang siyam gipasakaan og mga kasong administratiba sa Regional Internal Affairs Service (RIAS) 7 diin aduna pay dul-an sa 10 ka pulis ang naka-pending pa sa maong ahensya.
Niangkon si Sinas nga adunay ninja cops sa rehiyon 7 nga nalambigit sa pagpamaligya ug paggamit sa illegal nga drugas hinungdan nga gilusad ang kinalit nga drug test sa tanang personnel sa PRO-7.
Mga ngan sa siyam ka mga pulis gipugngan una samtang wa pa makuhai sa ilang mga habig.
Usa sa mga opisyal sa Regional Internal Affairs Service 7 nga di lang magpahingalan mitug-an sa Superbalita Cebu nga final na ang maong hukom human gi deny ang ilang mga motion for reconsideration.
Dunay uban kanila wa na mo-contest sa kaso tungod kay nasayod na sila nga dismissal ra ang sangpotan gumikan sa ka estrikto sa PNP tungod sa war on drugs ni Presidente Rodrigo Duterte.
Dugang sa police official nga gipadali sa Camp Crame ug ni Sinas ang pagresolbar sa kaso aron ang siyam mataktak na sa serbisyo sa PNP.
Nagpasalamat si Sinas nga sa sayo pa lang nasakpan na ang iyang mga personnel nga tiggamitan sa illegal nga drugas tungod kay kon napasagdan, modako na ang problema sa PRO-7.
Apan iyang gipasabot nga ang ninja cops sa Central Visayas di na kaayo daghan itandi sa nanglabay nga katuigan.
“If you remember, katong sa tulo nga nadakpan natin sa Station 3, when we studied their case, nakakuha sila og shabu pag nag operate sila. Kanang pag test buy, dili tanan ipa inspect, katong uban iipon nila...May gani sayo pa lang nadakpan na sila,”matod ni Sinas.
Padayon gihapon ang pag monitor sa PRO 7 sa ilang mga personnel ilabi na sa gipangtuohan nga nalambigit sa illegal nga kalihukan aron mapugngan kini.
Lakip sa gipang monitor karon mao ang mga PNP personnel kaniadto nga nag-absent without official leave na nga gituohan nga nidangop sa pagpamaligya sa illegal nga drugas.