GI-DISMISS sa kadagkoan sa Southwestern University (SWU) PHINMA ang duha ka mga lalake nga tinun-an sa senior high school human sila malambigit sa viral nga video diin gimolestiya ang usa ka 16-anyos nga babaye.
Ang Vice President for Student Life sa SWU PHINMA, Gilbert Braganza, nibutyag nga niadtong Oktubre 2 niluwat og desisyon ang tunghaan kun ang “decision on the disciplinary action for the senior high school students.”
Dugang ni Braganza nga gitug-an sa duha ka mga tinun-an nga sila ang anaa sa video, apan mihimikak sila nga ilang gimolestiya ang 16-anyos nga babaye.
Base sa Deparment of Education manual, susama ra ang exclusion sa dismissal diin di namamahimo nga maka-enrol sa susamang tunghaan ang tinun-an nga gi-dismiss apan makabalhin sa ubang tunghaan.
Itandi sa expulsion, kinahanglan kini og approval sa DepEd ug sa Commission on Higher Education (CHED) aron di na maka-enrol sa bisan asa nga tunghaan.
Dugang ni Braganza nga dili ra maapektohan ang ilang tunghaan sa insidente, apan mas pahugtan pa nila ang ilang pag-edukar sa mga tinun-an kabahin sa cyberbullying, cybercrime, physical abuse ug molestation.
“I want our schools to be very responsible in taking action towards protecting our students, community awareness, community responsibility and accountability to keep our students safe and secure,” si Braganza nagkanayon.
Sa wa pa gi-dismiss ang duha, gipaubos una sila sa preventive suspension sulod sa usa ka semana, si Braganza nibutyag.
Gibutyag usab niya nga nakig-konsulta na sila sa Department of Social Welfare and Developemnt (DSWD) kabahin sa plano nila nga partnership sa tunghaan aron malikayan ang child abuse ug uban pa.
Usa usab sa plano sa unibersidad mao ang pagbutang og crisis hotline sa tunghaan, pagpahigayon og nagkadaiyang seminar ug workshop aron malikayan ang maong panghitabo.
Niadtong Septiyembre dihang ni-viral ang video sa upat ka senior high school students nga gi-molestiya ang usa ka 16-anyos nga babaye sulod sa usa ka sakyanan.
Niangkon ang babaye nga hubog siya atol sa hitabo sulod sa sakyanan, apan dihang nakamata na siya, anaa na siya sulod sa lawak nga dunay aircon.
Niadto usab nakalabay nga buwan dihang ni nipasaka na ang Women and Children Protection Desk (WCPD) sa the Cebu City Police Office (CCPO) og kalapasan sa Anti-Photo and Anti-Video Voyeurism Act batok sa upat ka mga senior high.
Ang video gi-upload sa story sa Instagram account sa usa ka mga tinun-an nga nalambigit sa pagmolestiya.
Ang laing mga tinun-an nga nalambigit anaa magtungha sa University of Cebu ug University of San Carlos.
Wa pa ma resolbar
Hangtod ning pagsuwat, wa pa ma resolbar sa investigating committee sa UC ang kaso sa ilang tinun-an nga naapil sa kontrobersyal nga sex scandal sa usa ka menor de edad nga babaye nga nag viral sa social media.
Matod ni Attorney Elijah Manuel Sarausad, legal counsel sa UC, nga ila pang gipaabot ang resulta sa imbestigasyon sa komitiba nga gitahasan niini.
Apan iyang gipahibawo nga posibling sa sunod semana aduna nay desisyon ang tunghaan kon taktakon o di ang tinun-an o hatagan lang og suspension.
“Next week na gyud siguro kay nadugay ang reply/answer sa student. Nag cautious lang gyud ta to observe due process,” matod sa text message ni Sarausad.
Si Police Lieutenant Erlinda Mayam, hepe sa Women and Children Protection Desk sa Cebu City Police Office, nitug-an nga napasaka na ang kaso batok sa mga tinun-an nga pulos menor de edad.
Kasong rape ug acts of lasciviousness ang gipasaka nila sa piskalya sa siyudad sa Sugbo.