ONSE ka mga children in conflict with the law (CICL) nakaikyas sa Operation Second Chance sa Barangay Kalunasan, Siyudad sa Sugbo, niadtong Biyernes alas 6:30 sa gabii.
Sa pagsuwat ning taho, ang tulo sa 11 nahibalik na sa pasiidad.
Matod ni Konsehal Dave Tumulak, chairman sa peace and order sa Cebu City Council, nga sa dihang papanihaponon na ang mga bata sa ilang dormitory, nikalit lag hamag ang di momenos 30 kanila hinungdan nga naka gawas sila sa unang gate sa building.
Nidiretso ang mga bata sa main gate nga gibantayan sa usa lang ka blue guard.
Apan tungod sa kadaghan sa mga bata, wa makapugong ang gwardya, nakagawas ang 20.
Nagpanon pa ang mga menor de edad palugsong nga nagdagan, apan gipanggukod sila sa mga empleyado sa Operation Second Chance. Ang siyam niini nadakpan ug gibalik sa ilang tagsa-tagsa ka dormitory.
“Pag-abot didto sa 2nd gate gisuwayan unta to pagsira ang pultahan apan tungod sa kadaghan sa mga bata, na over power ang gwardya. Mao to nakagawas ang atong mga personnel on duty sa operation Second Chance. Gigukod nila kay nagpanon ra man pagkanaog. Ang nakuptan ra gyud ang siyam.Ang onse nakadagan gyud,”matod ni Tumulak sa Superbalita Cebu.
Dali sila nga nanawag sa mga pulis sa Siyudad sa Sugbo aron makuha pagbalik ang 11, apan wa na maabti pa sa kapulisan.
Matod ni Police Major Dindo Alaras, hepe sa Guadalupe Police Station, nga aduna na silay mga ngalan sa 11 nga mieskapo.
Matod ni Alaras nga ang ilang buhaton mao ang pag profile sa mga bata kon unsay mga kaso niini ug asa kini posibling motago.
“Naa na tay pangalan ani nila. Ang atong buhaton pagpangita nalang ani. Posible sa ilang balay or sa ilang mga paryente,” matod ni Alaras.
Nakig-alayon na hinuon ang mga ginikanan sa mga menor de edad sa mga pulis ug mga opisyal sa Operation Second Chance aron matabangan kini sa pagbalik.
Awhag ni Tumulak sa mga ginikanan nga tabangan ang mga pulis sa pagpabalik aron di madugangan ang mga kaso nga giatubang.
“Giawhag nako ang mga ginikanan aning mga bataa pagtabang lang sa Operation Second Chance para mabalik ang ilang mga anak. Kay kon ugaling dili na mabalik, posible nga mag-atubang nasad silag laing kaso na pud ba batok nila,” dugang ni Tumulak.
Nagpangidaron sila og 18 anyos paubos nga adunay mga kaso nga giatubang.
Gibutang sila sa pasilidad ug wa gitratar nga binilanggo tungod kay susama ra og balay ang naa sa sulod sa pasilidad.
Tungod sa insidente, gipahugtan sa management ang pagpatuman sa siguridad.