DAW walay pagduha-duha nga giputol sa 34 anyos ang iyang kinatawo niadtong Lunes mga alas 7:00 sa gabii sa Manuel Vega, Consolacion ning siyudad sa Cagayan de Oro.

Nilanding sa Northern Mindanao Medical Center (NMMC) ang biktima nga mao si Jamver Sevilla, 34, minyo, mulopyo sa susamang dapit.

Ang Sun.Star Superbalita nisuway sa pakighinabi sa biktima apan naglingo-lingo kini ug gibutyag sa biktima nga giingong daghan ang gustong mopatay kaniya hinungdan nga iyang giputol ang iyang kinatawo. Human naglingo nidumili na kini sa paghatag og dugang detalye.

Giingong problema sa pamilya ang hinungdan sa pagputol niini sa kinatawo. Gipuok ang pagputol niini ug gilabay ang sumpay niini.

Dihang naabtan sa asawa nga nagkadugo sulod sa lawak ang biktima gidali pagdala sa NMMC aron matambalan. Sa gihimong interbyu sa personhe sa NMMC ngadto sa asawa gibutyag niini nga problema lamang sa pamilya ang hinungdan.

Tuod man luwas na sa makuyawng kahimtang si Sevilla ning panahona apan walay nahimo ang mga doktor sa pagsumpay sa naputol nga kinatawo.

Daghan ang nagtuo nga pagmahay ug gibati nga walay pulos ang kaugalingon ug adunay personal nga problema ang biktima nga nagtukmod niini nga buhaton ang ingon ug giingong dili paghikog ang motibo sa biktima.

Sa pagsulat ning balita nagpabilin pa nga nagpaalim sa iyang samad ang 34 anyos.