GIUNAY pagputol sa lalaki ang iyang kinatawo tungod sa pagtuong wala na kini pulos niadtong Martes mga alas 5:00 sa hapon didto sa Barangay Balila, lungsod sa Lantapan, Bukidnon.
Giila ang biktima nga mao si Arnel Medico, 27, ulitawo, residente sa susamang dapit.
Nasapon kini sa iyang igsuon nga giabis sa biktima ang kinatawo hinungdan nga gidali kini pagdala sa balay tambalanan lakip ang naputol nga kinatawo.
Tungod kay dili man makapasalig ug kulang sa himan ang maong tambalanan, giduso sa Northern Mindanao Medical Center (NMMC) ning siyudad sa Cagayan de Oro ang biktima sa pagtuong masumpay pa ang kinatawo niini.
Bitbit ang naputol nga kinatawo, gidala sa NMMC ning siyudad ang biktima apan pakyas ang mga doctor sa pagsumpay niini hinungdan nga walay nahimo nga giuli sa puloy-anan niini ang biktima.
Ang igsuon sa biktima nasubo sa gibuhat sa iyang igsuon ug dili makatuo apan wala gihimakak niini nga magsige og hinuktok iyang igsuon sukad nga nasakit ang biktima og tipos.
Daw wala pa usab kini sukad nakauyab hinungdan nga nawad-an na kini og paglaum nga magamit pa ang iyang kinatawo.
Moabot usab ang higayon nga mawad-an og saktong pangisip ang biktima labina adunay gustong himuon ug dili makuha.
Gituohan sa igsuon nga desperado na si Medico, hinungdan nga nakahukom nga putlon na lamang ang kinatawo.
Gikataho usab nga sa wala pa niini giputol, nakig-inom kini sa mga higala ug gisaway nga daw dili na mapuslan ang kinatawo tungod daw usab sa kagamay niini. (Stephanie V. Berganio)