MGA duwa karon:
4:30 pm - Phoenix batok Meralco
6:45 pm - Alaska batok Magnolia
Gimugna ni import Dez Wells sa 2nd half ang 22 sa iyang kinatibuk-ang 32 puntos aron agakon ang San Miguel Beermen ngadto sa makutas nga kadaugan batok sa NaLEX Road Warriors, 98-94, sa miaging gabii sa out-of-the-country nga kombati sa Philippine Basketball Association (PBA) Governor’s Cup conference sa Coca Cola Arena sa Dubai.
Sa kadaugan, ang Beermen, nga nagtinguha og laing Grandslam title ning maong season, ningsaka sa 3-0 nga rekord samtang ang Road Warriors nangahagbong sa 3-1 nga baraha.
Ang katapusang duha ka mga puntos ni Wells maoy nakapalabaw sa Beermen, 95-94, sa nahabiling 23 ka mga segundos. Sa return play, nasipyat sa iyang itsa ang usa sa mga pambato sa Road Warriors nga si Kiefer Ravena.
Human niini, napasulod sa beteranong pointguard Chris Ross ang usa sa iyang duha ka freethrows aron inaton sa duha ka mga puntos ang labaw sa Beermen sa himatyong mga segundos.
Aduna pa unta’y poruhan ang Road Warriors nga makapaugos og overtime o kaha dag-on ang duwa pinaagi sa three-point shot apan napakyas sa iyang tira ang import sa Road Warriors nga si Olu Ashaolu.
Ang napasulod ni Ross nga duha ka freethrows maoy ningselyo sa kadaugan alang sa Beermen. Nihatag og saktong suporta kang Wells mao sila si Alex Cabagnot ug ang Sugbuanong higante.
Si Cabagnot niamot og 20 puntos samtang nihatag og 16 puntos si Fajardo.
Daghan ang nakadayeg kang Wells sa iyang gipakitang duwa hilabi na si San Miguel coach Leo Austria.
“I really told him to take charge and he’s the only guy who has the ability to make that shot, that’s why I went to him in our last few possessions,” matod ni Austria kabahon kang Wells, kinsa maoy nimugna sa katapusang 13 puntos sa Beermen sa duwa.
Taliwala sa ilang kapildihan, si NLEX coach Yeng Guiao nakuntento ra gihapon sa gipakitang duwa sa iyang mga batos.
“We were one rebound away from winning the game,” matod ni Guiao, kinsa nagtumbok sa usa ka rebound sa hinapos nga bahin nga posible untang magpadaog sa Road Warriors kon ilaha pang nakuha.
“Medyo malaking setback ‘yung diperensiya sa import scoring. Their import scored 32 points and ours only 11. But in spite of that we still had the chance to win the game. So that means the locals were able to cover the difference in the scoring.”
Ang Road Warriors gipangulohan ni Keifer Ravena pinaagi sa iyang 20 puntos samtang nidugang og 11 puntos matag usa sila si Poy Erram, Kenneth Ighalo ug Jericho Cruz.
Puntos matag usa:
San Miguel (98) - Wells 32, Cabagnot 20, Fajardo 16, Santos 9, Standhardinger 7, Ross 6, Pessumal 3, Nabong 3, Romeo 2
NLEX (94) - Ravena 20, Erram 12, Ighalo 12, Ashaolu 11, Cruz 11, Quinahan 9, Paniamogan 7, Galanza 7, Miranda 3, Fonacier 2. (ESL)