MGA duwa karon
12:30 pm- DBTC batok UV (High School)
2:00 pm- UC batok CEC (High School)
3:30 pm- SWU batok SHS-AdC (High School)
5:00 pm- SWU batok USC (College)
Nakatilaw na’g kadaugan ang University of San Jose-Recoletos Baby (USJ-R) Baby Jaguars ug ilang gipahimungtan ang University of Cebu-Lapu-Lapu and Mandaue Campus, 79-53, kagahapon sa 2019 Cebu Schools Athletic Foundation Inc. (CESAFI) high school division sa Cebu Coliseum.
Mao kini ang labing unang kadaugan sa Baby Jaguars human sila nasugamak sa sunodsunod nga kapildihan sa nag-una nilang upat ka mga tahas.
Ang Baby Jaguars, nga gikonsiderar nga usa sa mga sayong inilog sa kompetisyon gumikan sa ilang paghari sa miaging Partner’s Cup, wala motugot nga makapanghudlat kanila ang UCLM gikan sa sinugdanan.
Gipangulohan ni Kendrik Abarquez ang Baby Jaguars pinaagi sa iyang 21 puntos samtang nidugang og 18 puntos Kevin Guibao, kinsa maoy MVP sa Partner’s Cup nga maoy pre-season sa CESAFI basketball.
Ang UCLM, nga nahagsa sa 0-4 nga rekord, gipangulohan ni Joseph Nalos pinaagi sa iyang 15 puntos.
Sa laing duwa sa high school division gihapon, gipangbuntog sa University of Southern Philippines Foundation (USPF) Baby Panthers ang Cebu Institute of Technology-University (CITU) Wildkittens, 88-70.
Ang Baby Panthers ningsaka na sa 5-2 nga rekord ug aduna na kini hayag nga poruhan nga makakuha og usa sa upat ka mga puwesto sa semi-finals.
Gipangulohan ni Elijah Singson ang Baby Panthers pinaagi sa iyang 14 puntos, nihatag og 10 puntos ug 14 rebounds si Elian Yap samtang nihatag og 13 puntos si Christopher Isabelo.
Ang Wildkittens nangatagak sa 1-4 nga rekord.
Sa laing bahin, magpadayon ang aksyon sa liga karong hapon diin mosuway pagbawos ang University of San Carlos (USC) Warriors batok sa Southwestern University (SWU-Phinma) Cobras sa main game sa college division.
Sa premirong sangka sa duha ka mga kampo niadtong Septiyembre 21, gipangpahit sa Cobras ang Warriors, 62-59.
Ang duha ka mga kampo parehong naggunit og 4-2 nga rekord human sa ilang mga tahas sa 1st round sa eliminasyon.
Sa high school division, magkombati sa premirong duwa ang University of the Visayas (UV) Baby Green Lancers batok Don Bosco Technological Center (DBTC) Greywolves, mosunod ang engkuwentro sa University of Cebu (UC) Baby Webmasters batok Cebu Eastern College (CEC) Dragons dayon ang kombati sa SWU-Phinma Baby Cobras batok Sacred Heart School-Ateneo de Cebu (SHS-AdC) Magis Eagles. (ESL)