PUWEDE ko mo-imbitar nimog dinner?” Maoy nabasa ni Maricor kining teks sa iyang selpon. Padulong na siyang mopauli sa iyang balay sa Baryo Picas sakay sa traysikol. Daw gipakyaw niya ang traysikol kay siya ra mang usa ang pasahero. Bag-o lang siyang nakapa-deliber og ref sa balay sa iyang higala nga si Celsa sa baryo Baring. Ahente siyag mga aplayans ug konektado sa Galaxy Marketing. May bag-o siyang gikaila ug nahigala nga ahente sab og mga aplayans sa laing kompaniya. Si Nelson nga mihangyo nga makig-chat kaniya sa Facebook.
Gikan ni Nelson ang mensahe nga nabasa ni Maricor sa iyang selpon. Naisa ang iyang kilay kay gihilasan sa mensahe. Walay malisiya ang pagpakighigala ni Maricor kang Nelson, kay networking lang ang giapas ni Maricor. Negusyo ra gyud. Posible nga may kliyente si Maricor nga ang butang nga gipangita anaa sa kompaniya nga gialagaran ni Nelson.
Buwag sa bana si Maricor. Ug si Nelson, buwag sab sa asawa. Puwede silang magka pares. Ang nakaparat kay ang kasamtangang kapuyo ni Merto (bana ni Maricor) mao si Nova, ang asawa ni Nelson.
May upat ka anak sila si Maricor ug Merto nga nagtungha pa sa elementarya. Wala na magsuporta nila si Merto nga drayber og mini-bus. Isip single mom, si Maricor na lang ang naninguhag pangahente aron makabuhi ug makapa edukar sa upat nila ka anak. Gawas sa mga aplayans, nangahente sab siyag yuta ug mga alahas.
Sulod sa lima ka tuig nga wa na siyay lawasnong relasyon sa iyang bana, gipukos niya ang iyang atensiyon sa iyang mga anak. Nagpasalamat siya sa Diyos nga may naluoy niyang Amerkano, si Daniel nga usa ka biyudo. Nahigala niya kini sa Facebook ug kanunay na silang nag-chat. Usa ka tuig na nga nagpadala si Daniel og usa ka libo ka dolyar matag bulan kang Maricor. Dako kaayo kinig gikatabang sa ilang panginahanglan sa panahon nga di makahalin si Maricor og aplayans o lote. Wala na gyud siya mangitag karelasyon nga lalake. Kon ugaling mag-kinaunsa ang panghitabo, si Daniel na lang ang iyang sugton. Kon makigminyo kini kaniya, pagastuon niya alang sa pag-anular sa kasal nilang Merto.
Unya gibasa ni Maricor pag-usab ang teks ni Nelson nga nangimbitar niyag panihapon.
“Sorry, Nelson! Basig nagtuo ka nga tungod kay ang akong bana maoy kapuyo sa imong asawa, makig-relasyon sab ko nimo. Nag-ila ko nimo isip usa ka higala tungod kay parehas tag trabaho. Wala ko maghunahuna anang sosyalan!” tubag teks ni Maricor. Ug wa niya damha nga hapit na siya mosaylo sa iyang balay.
“Lugar lang, Dong,” ni Maricor ngadto sa drayber sa traysikol.
Mipadaplin sa karsada ang traysikol ug mihunong. Gitunolan niyag plete ang drayber ug mainampingong nanaog.
“Kon mangita man gani kog ikapuli sa akong bana, kana gyung makahaw-as sa among kalisod,” tuaw niya sa hilom dihang nahilusad na ang iyang duha ka tiil sa yuta. Kaibgan pa man god siyag lalake, kay madanihon gayud ang iyang bayhon nga daw wa pa kaagig panganak.
(KATAPUSAN)