SUPERBALITA CEBU

Sugilanon: Ang bili sa usa ka bolpen

PILA ba ang bili sa usa ka bolpen? Ang bolpen gigamit ko sa pagsulat sa mga papel aron isulat ko ang akong mensahe. Sa nagtungha pa ako, ang bolpen mahinungdanon ug mapuslanon kaayo ilabi na niadtong adlaw nga mokuha kog eksamin kun pasulit. Niadtong higayuna mokuha kog eksamin para makakuha kog scholarship sa pagtuon sa kolehiyo. Di pa libre niadto ang pagtungha sa kolehiyo. Kinahanglan nga utokan ka ug makapasar sa eksamin.

Panday ang akong amahan ug labandera ang akong inahan. Napulo kami ka managsuon ug ako ang kinamaguwangan. Kinahanglan may makuha ug makatapos ko sa kolehiyo aron makatabang sa among banay.

Sayo kadto sa buntag sa adlawng Lunes. Naglakaw lang ako paingon sa usa ka school foundation for scholkarhips nga manghatag og libreng edukasyon sa kolehiyo kon makapasar sa ihatag nilang eksamin.

Bakante ang akong amahan sa iyang trabaho sa construction work, nagpaabot og bag-ong proyekto. Si Mama Elsa wala pa makakolekta sa mga suking nagpalaba kaniyag mga sapot. Wala koy ikaplete sa sakyanan ug wala say bawon. Dala ko lang mao ang bolpen nga gisuksok ko sa likod nga bulsa sa akong pantalon. Ug wala ko damha nga nawala kini sa likod sa bulsa sa akong pantalon. Nagdali ako pagbaktas sa tulo ka kilometrong mga dalan sa dakbayan, nagkadusingot ug gikulbaan kay walay bolpen nga magamit. Nagpabilin ako sa ubos sa edipisyo sa school foundation. Nawani ko ang akong bolpen. Unsa bay buhaton ko?.

Naglingi-lingi ako sa nagkurus nga mga dalan. May makililimos nga buta sa usa ka aseras. May buli nga kawo sa iyang tupad, puno sa mga sensilyo. Miandar ang natarantar kong kaisipan. Miduol ako sa buta nga makililimos. Kadaghan sa iyang mga sensilyo sulod sa buli nga kawo. Gitutokan ko kini makadiyot. Miliot ang dautan kong hunahuna.

Sa walay pupanagana, mihinok ko pagduol sa buli nga kawo sa buta, maampingon kaayo sa pagduol ug pagkab-ot sa mga sensilyo. Nakahakop ako nga walay nakamatikod ilabi na ang buta nga makililimos.

Nakaginhawa akog halawom. Nakapalit akog bolpen sa usa ka tindahan. Ug may

sensilyo pod nga ikapalit kog pagkaon. Nakapanguros ko sa pagpangayog pasaylo sa Diyos nga Makagagahom.

Tuod man, nakapasar ako sa eksamin ug nakatungha sa kolehiyo.

May natapos na ako karon. Usa na ako ka maestro sa publikong tunghaan. Kon dili pa sa mga sensilyo sa butang makililimos dili ako maluwas sa akong kahimtang. Mao nga matag adlaw sa pagpaingon ko sa gitrabahoan kong tunghaan, mohapit gyud ko sa mga aseras ug mang-apod og limos o pagkaon sa mga makililimos. (KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph