MAKADUNGOG ko pirme nga kuyaw kuno ang biseklita. Bitaw, kuyaw kon magpataka ka lang og padagan. Wa may di kuyaw basta sakyanan, two-wheeled or four-wheeled.
Kuyaw ang sakyanan kay kon patakaan og padagan, duol ni sa disgrasya, mahimong ikaw ang maangol o ang naigo sa imong sakyanan. Kon two-wheeled, sagad ang driver ug naigo ang naangol.
I-consider usab ang imong sakyanan nga sama og armas, makaangol o makapatay. Bisan biseklita ra na, but sa igo-igong gikusgon ug imong kabug-aton ingon man sa biseklita, ang impact niana ngadto sa madasmagan kusog pa sa kumo ni Manny Pacquaio. Mahimong makaangol ra, or worst, makapatay.
Naghisgot ko ani kay daghan kaayo sa karsada karon ang reckless drivers. Mas daghan sa mga two-wheeled driver ang reckless. Kana lang magpadagan ko sa scooter, kadaghan sa mangsakdap or mosikit og maayo. Sa usa lang ka pamilok, ang disgrasya naa dayon kon masipyat.
Sa ako lang nasayran kaniadto sa Cebu City Transportation Office (CCTO), ang mga aksidente nga naglimbigit og motorsiklo di mominos og 20 sud lang sa usa ka adlaw. Pero bisan unsaon pa nimog badlong, daghan gihapong mga hanggaw sa two-wheeled drivers.
Disiplina
Duna nay seminars ang Land Transportation Office (LTO) alang sa public transport drivers. Ilang gipailawom sa seminar kadtong mga driver nga nag-renew sa ilang mga lisensya. Apan duna bay epekto kini ngadto sa mga driver?
Di sab ko motuo nga sa kadugay nang nagmaneho nila wa sila mahibawo sa traffic laws. Nakahibawo na sila, apan kay wa may enforcement o kuwang niini, magpadayon ang pagpangabuso sa karsada. Mao na ang dakong kakuwangan sa atoang kadalanan. Tungod sa kakuwang sa disiplina, ang sayop nahimo nang sakto.
Unta, ang LTO maghatag o mosangon og mas daghang mga pulis ug enforcers sa pagpatuman sa mga lagda sa trapiko sa kadalanan. Kanang estriktong pagpatuman aron pagdisiplina sa drivers. Yuna pa, asa na diay tong dakop sa counterflowing?
Hapsay unta
Kay ang kagamhanan man ang dunay gahom sa pagpatuman sa balaud, unta di suol suol o ningas kogon ang estilo. Panahon panahon ra sab ang pagpatuman. Mahadlok sila sa political backlash sa mga tawo nga nangasuko tungod kay gidakop sa paglapas sa balaud.
Kon ingon niana ang mentalidad sa mga opisyal sa kagamhanan, maayo pag manira na lang ang buhatan sa transportasyon. Kon kuwang sa pagpatuman sa balaud sa trapiko, di pa ni mao ang kaguliyang karon sa kadalanan.
Ang tinud-anay nga pagpatuman sa balaud sa trapiko gikinahanglan nga consistent aron mahapsay ang atoang kadalanan nga napuno na sa mga sakyanan.