Binasi sa Habakkuk 1:2-3; 2:2-4; Salmo 95; 2 Timoteo 1:6-8, 13-14; Lucas 17:5-10
MAY kaila ako nga nagbutang og semilla sa Mahogany sa usa ka kaang nga puno og yuta. Iya kining gibilin sa kilid sa koral sa iyang balay. Nahikalimtan niya kini hangtod nga midako ang maong punoan. Usa ka adlaw niana nakamatikod na lang siya nga mibugdo na ang salog sa ilang kusina. Gamot diay kini sa punoan nga buot mosubwak pagawas.
Nahinumdom ko sa usa ka templo sa Cambodia nga gihimoan og pelikula ni Angelina Jolie. Dinhi mga dagkong paril nangatumpag tungod sa hinayhinay apan kanunayng pagsubwak sa mga gamot ug sanga sa mga punoan. Naukay gyod ang mga pundasyon sa templo ug nangahibat ang mga bato. Gilupig sa buhi nga butang ang patay nga butang. Hinayhinay basta kanunay.
“Kon aduna kamoy pagtuo sama sa liso sa mustasa, makaingon kamo [niining] kahoy nga sikomoro, ‘Maluka ka ug matanom didto sa dagat’ ug motuman kini kaninyo,” sumala sa ebanghelyo ni Lucas. Gigamit ni Lucas ang maong larawan isip tubag sa hangyo sa mga apostol nga dugangan ang ilang pagtuo. Ang buhing pagtuo makaluka sa mga patay nga panghunahuna ug kinaiya.
Nagpadayon si Jesus sa pagtudlo nga ang usa ka ulipon nga bag-o pa lamang nahuman pagbudlay sa umahan, inig-abot niini sa balay kinahanglan mangalagad lang gihapon sa iyang agalon. Unya moingon ang maong sulogoon: “Mga ulipon kami nga dili takos; nagbuhat lamang kami sa angay namong buhaton”. Mga pulong kini sa pagpaubos. Ang pagtuo diay nga gamhanan ug mabungahon usa ka pagtuo nga mapaubsanon usab.
Apan aduna pa gyoy lain. Sa libro ni Habakkuk, nagbagolbol ang propeta nga daw dili na maminaw ang Ginoo. Daghan nang miawas nga dugo ug wala gihapon manggilabot ang Dios. Mitubag ang Ginoo nga matuman gayod ang Iyang gisaad nga kaluwasan kay dili mosayo ang Dios ni maglangay. Masaligon diay ang pagtuo nga tanan mahitabo sumala sa gitagana nga panahon sa Dios.
Gasa ang pagtuo sa Dios. Sa sulat kang Timoteo, si Pablo nagpahinumdom kaniya nga “padilaabon ang gasa sa Dios nga imong nadawat pinaagi sa pagtapion sa akong mga kamot”. Nagpadayon ang maong sulat nga dawaton ni Timoteo diha sa pagtuo ang mga maayong pulong gikan kang Pablo.
Mapaubsanon, masaligon, ug gasa ang pagtuo. Ang nagpuyo diha sa pagtuo morag ang semilla sa Mahogany nga nahisgotan sa ulohan. Mahimo niining bungkagon ang mga bato nga kasingkasing ngadto sa paghinulsol. Sa hinayhinay ug kanunay nga paagi bungkagon usab ang mga bato nga mibabag sa atong dalan padulong sa hustisya ug panaghiusa.
Kumusta man ang atong pagtuo?