GILANTAW nga di na mahitabo ang kahuot sa mga kargamento diha sa Cebu International Port (CIP) nga nakabara sa paglambo sa atong lokal nga ekonomiya pipila ka tuig nga milabay dihang nasugdan na ang operasyon sa gitawag nga finger pier.
Giinaugurahan ang giingong finger pier, nga mobili og P1.040 bilyones, sa miaging Septembre 30, 2019.
Matod ni Atty. Tomas Riveral, ang chairman ug chief executive officer sa Opascor, nga kining maong pier natukod sa Opascor tungod sa pagtinabangay sa Cebu Port Authority (CPA) ug ang BDO Unibank Inc. 0 Commercial Banking Division (VISMIN).
Nganong finger pier? Unsaon nga mora man kini og tudlo nga nisiwil gikan sa CIP.
Nagkanayon si Riveral nga kining maong pier mosulbad sa panginahanglan sa dugang espasyo alang sa international port kay usa kini ka pasilidad nga 125 ka hektarya.
Gawas nga mohatag kini og dugang berthing space alang sa mga international nga mga barko, naa pa gyuy Roro-ramp aron ubay-ubay sa mga kargamento mahimong masakay og mga barge padulong sa destinasyon niini sa amihanan ug habagatan sa lalawigan sa Sugbo.
Sa niining paagi, makuhaan ang mga container vans nga mohuot sa kadalanan ug makapasamot sa kahuot sa trapiko.
Daghang Salamat Attorney Riveral ug Opascor!
Binaliw
Dugang elektrisidad nga 20-40 megawatts ang mahatag unya sa usa ka waste facility diha sa Barangay Binaliw tungod niining proyekto nga magtukod og planta nga waste-to-energy (WTE).
Malantaw nato kini dihang ang mga opisyal sa ARN Central Waste Management Inc. nakigpirmahay og usa ka memorandum of understanding tali sa Amsterdam Waste and Environment Consultancy Technology (AWECT).
Kining MOU-signing nahitabo atol sa usa ka tigum sa mga negusyante nga sakop sa Mega Cebu ug usa sa testigo sa pagpirma mao si Honorary Dutch Consul Dondi Joseph.
Matod pa ni Sherwin Santos, ang presidente sa ARN Central, ilang tinguha nga maoy mahimong waste-to-energy standard sa Pilipinas.
Atong nabantayan nga ang maong kalihokan gitambongan kanilang Bise Mayor Mike Rama ug ang chief of staff ni Mayor Edgar Labella nga si John Labella.
Dihang atong nahinabi si Rama, nagkanayon kini nga gikinahanglan ang pagpalapad sa kadalanan labi na padulong sa waste facility diha sa Barangay Binaliw.
Ang mga negusyante ug pipila ka mga mayor sa Metro Cebu nakauyon nga gamiton kining waste facility diha sa Binaliw tungod kay kini modern ug maayo ang lokasyon. (@anol_cebu sa Twitter)