KON si Senate President Vicente ‘Tito’ Sotto III ang pabut-on, gusto niyang bungkagon ang Philippine Drug Enforcement Agency (PDEA) ug magtukod og Presidential Drug Enforcement Authority (PRDEA) nga maoy motutok sa kampaniya batok sa illegal nga drugas. Sa iyang sugyot balaudnon, gusto ni Sotto nga kining pagatukoron nga PRDEA maoy mag-usa sa PDEA ug Dangerous Drug Board (DDB) nga maoy policy-making body ug maoy mo-implementar sa Republic Act 9165 o Comprehensive Dangerous Drugs Act of 2002. Hatagan kini og gahum pinaagi sa pagbutang og bureaus nga ubos niini sama sa law enforcement, prosecution, prevention ug rehabilitation.
Siguro nakita ni Sotto nga dili epektibo ang PDEA sa kampaniya batok illegal nga drugas o ba kaha gumikan sa kurapsiyon. Ambot og nganong nakahuna-huna si Sotto ning maong balaudnon. Wala na siguro siyay laing mahuna-hunaan nga balaudnon nga mapanday nga makabenepisyo ang katawhan.
Kon sa majong pa ni, makapangutana kita: nganong bungkagon man ni Sotto ang kamada sa petsas nga nabahig o na-file naman kini? Mahulog man ni sa panultihon nga ‘mao rang iroa apan lahi lang og ribbon’. Mao ra man ni nga set up ug functions sa PDEA ug kining pagatukuron nga PRDEA. Kon mapasar ang maong balaod, ang mga operatiba sa PDEA puwedeng mobalhin sa Philippine National Police (PNP) o ubang mga ahensiya.
Kon ang problema sa PDEA mao ang imahin gumikan sa korupsiyon, nganong dili man lang nato palambuon ug hatagan og kompletong suporta? Kon daghan og binoang, dan atong panggukdon ang mga nagbinoang sa ilang serbisyo aron masilutan. Ibalik sa PNP ang kampaniya sa illegal nga drugas? Sus, diha na man ta gikan, ibalik na pod. Pakyas ang PNP sa kampaniya. Modaghan samot ang mga ‘ninja cops’ ani.
Kon pakyas ang PDEA sa ilang mandatu, buot ipasabot nga ato usab nga bungkagon ang PNP kay pakyas sa kampaniya batok sa kriminalidad? Gumikan kay daghang lamok, ato na lang sunugon ang balay? Kon matukod na ang PRDEA, makasiguro kaha si Sotto nga magtinarong ang mga tawo nga maglangkob aning ahensiya? Mas epektibo na kaha ang kampaniya batok sa illegal drugs? Ambot lang. (bobbygnalzaro@gmail.com)