MIBAHA ang simpatiya sa pamilyang Gonzalo tungod sa kamatayon ni Jouie Lee, ang call center agent nga nakaplagang patay sa Barangay Tagbao, bukirang dapit sa Dakbayan sa Sugbo. Gituohang gi-salvage si Jouie Lee, kinsa gigapos ang mga kamot ug tiil ug dunay samad pinusilan sa ulo.
Sa social media comments sa mga tawo nga nakaila kaniya, gikan sa iyang mga kabanay, kahigalaan ug kaubanan, puros nihulagway kang Jouie Lee nga buotan, mahadlok gani makig-away. Siya ang gisaligan sa pamilyang Gonzalo kay duna siyay maayong career sa call center industry. Ingon pa sa iyang inahan nga si Jocelyn, dunay mga damgo ug plano ang iyang anak alang sa iyang mga manghod. Apan uban sa kamatayon ni Jouie, namatay usab kini.
Matod ni Jocelyn, di na lang siya mohangyo sa mga pulis nga iprayoridad ang kaso sa ilang anak kay daghan pang mas importante nga mga kaso nga wa gani masulbad sa mga awtoridad.
Bitaw, sa kadaghan sa mga kasong murder nga wa masulbad, wa na lang magdahom pa ang mga ginikanan ni Jouie nga masulbad ang pagpatay sa ilang anak.
Tinuod bitaw, gipul-an na ang publiko sa pagpaminaw sa mga linyang “love triangle, personal grudge ug drugas” isip motibo sa pagpatay. Di diay pwedeng mistaken identity, gitulis ug uban pa?
Sa imbestigasyon, mahimo unta nga sugdan sa imbestigador ang rota ni Jouie sa iyang lakaw niadtong adlawa. Di lang kay mangutana ra sa background sa biktima ug pagkahuman, period. Ingnon rang uncooperative ang mga tagtungod.
Hayan makatabang sa imbestigasyon ang pagsubay sa rota ni Jouie, gikan sa balay, padung sa iyang higala sa Barangay Capitol. Sa panahon karon nga daghan ang CCTV nga gipangmontar, hayan magiyahan pa ang kapulisan.
Tinuod, yano nga call center agent si Jouie, apan ang kinabuhi di matumbasan ni bisan unsa. Ingon niana ang kinabuhi sa tawo.