GIAWHAG sa Hunta Probinsiyal ang mga local government unit ingon man ang mga konsehal sa matag lungsod nga amendahon ang mga ordinansa kabahin sa truck ban ug i-synchronize ang schedule, ilabi na sa mga Siyudad sa Sugbo, Mandaue ug Talisay.
Giduso kini human sa kadaghan na sa mga reklamo nga nadawat gikan sa publiko kabahin sa kahuot sa trapiko sa Metro Cebu nga nakamugna og kalangay sa mga tinun-an ug mga trabahante matag adlaw.
Usa sa mga gibasol sa publiko ang dagkong trucks ug trailers nga sagad makamugna og traffic, kon di maguba, madisgrasya.
Si Bokal Francis Edward Salimbangon nga maoy nangamahan sa resolusyon, nihatag og schedules sa truck ban nga posibleng sundon sa mga siyudad kon maaprubahan.
Mopatuman unya sa truck ban sugod alas 6:00-8:00 sa buntag ug alas 4:00 sa hapon ngadto na sa 7:00 sa gabii matag Lunes hangtod na sa Sabado, gawas sa Dominggo ug holiday. (ANV)