USA ang patay sa panagbangga sa usa ka motorsiklo ug van sa Barangay Granada, lungsod sa Boljoon, habagatang Sugbo pasado alas 2 Biyernes sa hapon, Oktubre 4.
Namatay ang drayber sa motorsiklo nga giila nga si Luciano Villamor, 46, taga Barangay Puntod, lungsod sa Oslob human nisungag sa kasugat niining van sa nahisgutang lugar.
Matod ni P/Msgt. Fernando Toledo nga nahinabi sa Superbalita Cebu nga nakaengkwentro sa motorsiklo ang usa ka Toyota Hi Ace Grandea van nga gimaneho ni Ramil Cabago, 46, taga Barangay Basak, Dakbayan sa Mandaue.
Nagsubay ang duha sa managlahi nga mga lane, apan giingong si Villamor nisuway pag overtake sa laing sakyanan.
Nisulod siya sa lane nga gisubay sa van nga iyang kasugat ug naabtan hinungdan sa panagbangga.
Dugang pa ni Toledo nakaangkon og bun-og ug bali sa kalawasan si Villamor.
Si Villamor gideklarar sa doktor nga dead on arrival sa tambalanan.
Samtang si Cabago kasamtangang gipriso sa Boljoon Police Station samtang nagpaabot sa pamilya ni Villamor. Kasong reckless imprudence resulting to homicide ang atubangon nga kaso ni Cabago. (BBT)