WA PAY matumbok nga suspek ang kapulisan sa Talamban sa pagpatay sa call center supervisor nga si Jouie Lee Villagonzalo, kinsa napalgan ang lawas sa sitio Kabaasan, Barangay Tagbao, Siyudad sa Sugbo, niadtong Miyerkules sa buntag, Oktubre 2.
Apan nasayran sa mga imbestigador sa Talamban Police Station nga nag-inom si Villagonzalo sa usa ka imnanan sa uptown area sa Dakbayan sa Sugbo.
Si Police Corporal Michael Angelo Singson, imbestigador sa Talamban Police Station, niingon nga ila nang nahinabi ang mga ginikanan sa biktima ug pulos nitug-an nga way kontra si Jouie.
Mga ginikanan ug live-in partner niingon nga wa usab kini malambigit sa illegal nga kalihukan.
Makig alayon sila sa mga tawo nga nakaila kang Jouie sa trabahoan kon adunay nasayran labot sa kinabuhi niini.
Nakit-an
Dugang ni Singson nga sa wa pa ma missing si Jouie, nakit-an siya sa usa ka imnanan sa dalan Juana Osmeña, habig sa Barangay Capitol Site nag-inom.
Wa pa nila mahibaw-i kinsa ang kainom ni Jouie.
Si Jocelyn Villagonzalo, inahan ni Jouie, niingon nga ang iyang anak nananghid sa amahan nga moadto sa Capitol Site aron makigkita sa iyang higala.
Human niadto, wa na nila ma-contact si Jouie Lee.
Matod ni Singson nga Ilang adtuon kon aduna bay naka montar nga CCTV camera aron masayran kinsa ang mga kauban niini sa inom aron didto sila magsugod sa ilang imbestigasyon.
“Adtuon nako tong imnanan kay nag inom na. Ang uyab wala kahibawo kay wala na mananghid sa uyab mao nang adtuon nako kay akong tan-awon kon naa bay CCTV didto aron didto mi magsugod sa imbestigasyon,” matod ni Singson.
Ang naghatag sa kasayuran kang Singson mao ang higala ra usab ni Jouie Lee nga naestorya pa niini atol sa pag-inom kauban ang laing grupo sa mga barkada sa biktima.
Si Police Captain Jonathan Taneo, hepe sa Talamban Police Station, niingon nga wa sila makatutok lang sa usa ka anggulo, kon dili ilang subayon ang tanang posibling hinungdan.
Iya nang gimandoan ang iyang mga imbestigador nga makighinabi sa suod nga mga higala niini ug mga kauban sa trabaho sa biktima.