NAGTINGKAGOL sa prisuhan ang duha ka mga gituohang isnatser human naabtan sa kapolisan niadtong Lunes mga alas 3:45 sa hapon sa JR Borja St., ning siyudad sa Cagayan de Oro.
Gibalhog sa prisuhan sa Police Station 2 (PS2) sa Cogon sila si Benjamin Gabuya, taga Brgy. 22 ning siyudad ug Antonio Seno, 25, taga Brgy. 27, ning siyudad human nasapon sa mga bag-ong polis nga nipahigayon sa ilang Field Training Program.
Nabiktima sa duha ka mga suspetsado si Melba Patpat, 19, dalaga, lumad nga taga Libona, Bukidnon knisa misuroy lamang niadtong tungora ning siyudad kay adunay paliton.
Kalit lang nga gibira sa duha ka mga suspek ang iyang kwentas nga mobalor og P2 mil ug dali nga nangdagan.
Ang insidente nakita sa duha ka polis nga nagtindog niadtong tungora hinungdan nga gigukod ang mga suspetsado ug malampuson kining nasikop.
Gi-turnover ngadto sa PS2 ang mga suspetsado alang sa pagpasaka og tukmang kaso. Nakuha ra usab pagbalik ni Patpat ang iyang mahalon nga kwintas.
Sa iyang bahin ni Seno nga nahinabi sa Sun.Star Superbalita miingon nga kalisod sa panahon ang nagtukmod kaniya sa pagpanglabni labina nga wala siyay grado ug walay tsansa nga makatrabaho.
Dugang ni Seno nga kini lamang ang unang higayon nga nakabuhat og pagpanglabni ug naaghat lamang. (SVB)